HINGPIT nang ningbalit-ad ang mga panahom ug nahimo nang grabe ka inilog ang Toronto Raptors nga makalangkat sa 2019 National Basketball Association (NBA) title ug grabe na sab ka inilog si Kawhi Leonard nga modaog sa Finals MVP award.
Kini human sa 105-92 nga kadaugan sa Raptors batok sa back-to-back defending champion Golden State Warriors sa Game 4 niadtong Sabado (RP time) nga naghatag kanila og 3-1 nga bintaha sa finals best-of-seven series.
Dihang napilde ang Warriors sa Game 3, sila lang gihapon ang gikonsiderar nga inilog basi sa nagkadaiyang dagko nga betting odds apan nausab ang tanan dihang nausban sila’g kapilde sa Game 4.
Sa PointsBet, ang Raptors nakalista sa -715 nga maoy modaog sa series. Nagpasabot kini nga ang $1000 nga pusta alang sa Raptors igo lang modaog og $285.
Sa BetStars ug FanDuel, ang Raptors nga kalista sa -700 samtang sa SugarHouse kay -590.
Naapsan na sab ni Leonard si Warriors pointguard Stephen Curry sa inilugay sa Finals MVP.
Si Leonard nakalista sa -715 sa PointsBet, -650 sa Fan Duel samtang -500 sa SugarHouse.
Kon molampos ang Raptors paglangkat sa NBA title, hayan maugbok ang legasiya sa Canada sa kallibutan sa basketball.
Ang Raptors, nga nagtinguha nga mahimong labing unang team nga gikan sa gawas sa United States nga makalabni og NBA title.
Aduna nay kahigayunan ang Raptors sa pagtuman sa ilang pangandoy sa Game 5 nga ipahigayon ugma (RP time) sa ilaha mismong balwarte.
“You would need to be probably asleep or something if you didn’t realize that everybody is pretty excited,” matod ni Raptors coach Nick Nurse.
“It’s the first time. Any team that goes through this the first time has an abundance of energy about their team.”
Ang Raptors nakasulod sa NBA niadtong 1995 isip expansion team ug karon pa kini nakataak sa Finals.
Grabe na ang kahinam sa Canadians nga makabaton og titulo sa NBA ang Raptors.
“Somebody was saying it’s more like a soccer, like how those fans are so passionate,” matod ni Raptors guard Fred VanVleet.
Apan dili pa angayang magsaulog ang Raptors gumikan kay dili gihapon nila maseguro ang tanan hilabi na kon makabalik na’g duwa alang sa Warriors si Kevin Durant sa Game 5.
Ang Warriors nakasuway na pagbangon gikan sa 3-1 nga biya sa series diin ilang gipakaging ang Oklahoma City Thunder sa Western Conference finals niadtong 2016. Ning tuiga, nagduwa pa si Durant sa Thunder. (AFP, ESL)