KINSAY di madani kon ingnon kang modoble ang imong kwarta sa di pa gani abtan og usa ka tuig? Apan angay nga hinumdoman ang giingon sa Amerkanong comedian nga si Will Rogers, “The quickest way to double your money is to fold it in half and put it in your back pocket.”
Nagwarning sa publiko ang Securities and Exchange Commission (SEC) batok niining mga “investment scams,” sa mga “double-your-money” ug “pyramiding schemes” nga nagsaad nga mohatag og dakong interest sa imong kwartang hinaguan apan sa kalit lang mawagtang.
Nagbansiwag sa warning sa SEC ang KAPA-Community Ministry International Inc. Apan duna pay laing 21 ka mga wa marehistro nga investment entities nga giila sa SEC ug kinahanglang bantayan sa publiko aron di masulod sa laang.
Mao kining mosunod: MGA Business Enterprises, Coophub Multimedia Services, Jogle Innovative Marketing, Global Dream Zion, Grappler, Sherpan, BCT Marketing/BCT Motorcycle and Car Trading, RTM/RTM Pharmacy and General Merchandise, Diamond Marketing, Fusion Marketing, FMarket, Cirfund, Vibearn, Onepro, BCC/BCC Cosmetics Trading, Unlishop Compensation Plan Marketing, VUCC, Bitrain, Tcoin, Crowd Royals, ADA Farm Agri Venture and Nermie Marketing/Nermie Health and Beauty Products Trading.
Matod pa sa SEC kining maong mga investment scams sagad gipaagi sa social media, lakip na sa Facebook, YouTube, Twitter, LinkedIn ug uban pa.
Ang interest nga gitanyag gikan sa 20 porsento ngadto sa makabungog nga 400 porsento kada buwan. Ang investment ipadeposito sa ilang account sa bangko, Coins.ph, GCash, money remittance company ug face-to-payment sa ilang mga ahente.
Nabalaka si Police Brigadier General Debold Sinas, pangulo sa Police Regional Office (PRO) 7 sa pagsulod sa KAPA dinhi sa Sugbo kay ang target niini mga magtutudlo, pulis, mga sakop sa Bureau of Jail Management and Penology ug sa Bureau of Fire Protection.
Matod ni Sinas, iyang relibohan ang mga pulis nga moapil sa KAPA, indepedent religious organization, ug embargohan sa ilang service firearms.