Micro Finance Nanay
Ramon Aboitiz Foundation, Inc. RAFI (RAFI)
NAA sa mga kamot sa tawo ang iyang maayong kaugmaon. Ubanan lang gyud ang paningkamot og lig-on nga pagsalig sa Ginoo.
Ako si Liduvina Jumang-it, 58, nagpuyo sa Purok 3, Montana, Baclayon, Bohol. Aduna akoy bakeshop nga sa kaluoy sa Ginoo napatukod nako sa akong kaugalingong paningkamot.
Sa una pa lang gusto na gyud kong magtukod og bakeshop kay nahilig na ako og panghudno, apan wala lang gyud koy sakto nga puhonan ilabi na alang sa mga gamit. Nausab kini niadtong 2001 dihang nakahulam ko sa akong kaila og gamay nga puhonan aron ipatukod og gamay nga panaderya.
Pagsugod, ginagmay lang ang akong gipangbuhat nga produkto kay wala pa man koy tarong nga lugar alang sa akong negosyo. Gamay ra sab ang akong nahimong ginansiya.
Tuig 2015 dihang nakadungog ko sa RAFI Micro-finance nga programa. Naagni ako sa pag-apil ilabi na kay aduna silay insurance. Ako gyud nga gidapat ang tanan nakong hinulamang kwarta sa akong panaderya maong dali kining nilambo.
Karon, aduna na akoy dako nga bakery ug nakaluagluag na gyud ko og gamay aron makatabang sab sa akong pamilya.
Makaingon ko nga kon gamiton lang gyud og tarong ang kahigayonang moabot, dili gyud makawang ang paningkamot.
Niasenso ang bakeshop ni nanay Liduvina kay gipahimuslan niya sa saktong paagi ang kahigayonang niabot nga makahuwam og puhonan aron mapalambo ang negosyo.