USA ka 30-anyos nga lalaki ang nagtingkagol na karon sa prisohan human kini makuhae og shabu diha sa iyang sampot nga gisuway ug palusot alang sa usa samga piniriso sa Mandaue City Jail, pasado alas 10 sa buntag niadtong Dominggo, Hunyo 9.
Nasikop si Paulo Guinto, taga Barrio Luz, siyudad sa Sugbo, human nakit-an sa mga jail guard nga naay nagsiwil nga parte sa condom nga iyang gisulod sa iyang sampot.
Naay sulod nga usa ka medium pack nga gituohang shabu ang condom nga naa sa sampot ni Guinto.
Matud ni Jail Senior Insp. Mark Toñacao, ang assistant jail warden sa MCJ, nga wala man makita nga kadudahan ang lihuk ni Guinto, apan gisukit- sukit sab kini pag-ayo kay dili man kaliwat niini ang gibutyag nga pangalan sa piniriso nga buot niyang duawon.
Atol sa paghiling sa hubo nga lawas sa dinakpan, isip maoy standard operating procedure (SOP) sa mga modalaw sa prisuhan, didto nabantayan ang nisiwil nga parte sa condom.
Sa iyang bahin, giangkon ni Guinto nga sa una nga paghangyo sa iyang ig-agaw nga mopalusot sa drugas wala siya mosugot, apan niadtong Dominggo, natintal na siya sa offer nga bayran siya og 5 mil hangtud sa 10 mil pesos, bugti sa maong serbisyo.
Matud ni Guinto nga napugos siya sa pagsugot sa tanyag sa iyang ig-agaw kay gikinahanglanon ang kwarta alang sa giingon nga pagpa-opera sa iyang anak.
Giangkon hinuon usab ni Guinto nga mogamit siya og drugas, ug gawas sa 5 mil hangtud sa 10 mil nga makwarta niya bugti sa pagpalusot sa shabu, giingong malibre usab siya nga makasuyop og shabu.
Dugang niini nga iyang ig-agaw ra usab ang ni- enganyo kaniya.
Nagbasol man, apan matud niya nga atubangon nalang ang kaso nga ipasaka batok kaniya.
“First time pa gyud to nako, ikaduha nato hangyo sa ako ig-agaw, pag-Saturday unta, dili unta ko, gibalikan ko pag-Sunday, nisugot nako kay kinahanglanon,” saysay ni Guinto sa Superbalita Cebu.
Dugang ni Guinto nga didto na sa Barrio Luz gipansak na sa iyang sampot ang kontrabando hangtud na naglinya alang sa dalaw.
Sa dihang gi-strip search na siya, giingon nga diha na siya nakulbaan, hinungdan nga nakautong, ug nisiwil ang parte sa condom.
Samtang motabang sa paghimo og background check ang Mandaue City Police Office (MCPO) kang Guinto ug sa piniriso nga hatdan unta niini og drugas.
Gidayeg ni MCPO director Police Colonel Julian Entoma ang paghingusog nga gihimo sa Bureau of Jail Management and Penology (BJMPO) nga wala na gyuy kontrabando nga makalusot pa sa pasilidad.
Giangkon ni Entoma nga hugot nga koordinasyon ang ilang gihimo sa tulo ka ahensya nga ubos sa pamahala sa Dept. of Interior and Local Government (DILG). (FMD)