GIBUHIAN sa mga pulis ang kolumnista nga si Margarita Valle tungod kay “mistaken identity” ang pagkasikop niini adlaw’ng Dominggo, Hunyo 9, sa Laguindingan Airport, Lungsod sa Laguindingan, Misamis Oriental.
Mismong ang tigpamaba sa Philippine National Police nga si Police Colonel Bernard Banac niingon nga basi sa witness, dako lamang kaayo og kaangid sa hitsura ni Margarita Valle ang tinoud nga suspek.
Matud ni Banac nga pag-abot sa witness, deretso kining miingon nga dako lang og kaangid niini ang suspek nga maoy subject gayud sa warrant.
Giaresto si Valle sa hiniusang pwersa sa Criminal Investigation Group-Zambonga Peninsula, Aviation Security Group, ug 102nd Brigade ug 53rd Infantry Battalion ug uban pang special unit uban sa pakigkoordinar sa Laguindingan Police Station dihang si Valle pasakay na sa eroplano gikan sa iyang workshop training sa Siyudad sa Cagayan de Oro.
Giaresto kini pinasikad sa warrant of arrest nga giisyu sa Calamba, Misamis Occidental Regional Trial Court Branch 36 pinaagi ni Judge Bernadette Paredes Encinareal niadtong December 29, 2011 gumikan sa kasong multiple murder with quadruple frustrated murder, destruction of government property, ug arson.
Tungod sab sa pakigbisog niini sa mga lumad sa komunidad hinungdan nga ga sitag kining sakop sa walhong grupo.
Butang nga hugot nga gikondena sa mga sakop sa prensa labina sa National Union of Journalists of the Philippines (NUJP) nga nikondena sa pag-aresto.
Ang iyang anak nga si Rius Valle mga alas 12 Dominggo sa kadlawon, nagpaabot pinaagi sa iyang Facebook account nga gibuhian na ang iyang inahan nga gikan sa pagkaaresto sa Lungsod sa Laguindingan gibiyahe paingon sa Camp Abelon sa Dakbayan sa Pagadian.
“Finally, my mother was released from Camp Abelon just now. My words are not enough to express my utmost gratitude to all. Di ko kayo ma isa-isa dahil halos buong Pilipinas naghahanap sa kanya. Rest assured we will stay vigilant,” matud niini ug midugang nga manubag ang kapulisan sa sayop nga pag-aresto nga naghatag og sobrang kahasol sa iyang inahan nga giingong nagsige lang og hilak atol sa pag-aresto.
“We will hold them accountable, if they can do this to a journalist, what will prevent them from doing this to ordinary citizen? We will hold them accountable,” matud ni Valle.
Si Police Lieutenant Colonel Surki Sereñas nibutyag sa Sun.Star Superbalita gakahitabo gyod kining mistaken identity hilabina dili perpekto ang kapulisan.
Sa ilang hanay mao kini ang ilang gibantayan tungod kay kung masayop kini dako kini kaayong kasupakan ug mahimo kaayong kasuhan ang mga arresting officer niini.