GIPUSIL sa nakamotorsiklo ang usa ka dispatser niadtong Sabado sa hapon, Hunyo 8, sa usa ka barber shop sa Barangay Bugo, Siyudad sa Cagayan de Oro.
Patay si Antonino “Caloy” Salaan, 52, dispatser sa parkingan sa motorsikad ug residente sa maong dapit.
Sa nahipos nga impormasiyon gikabutyag nga gitouhang gigamit sa mga suspek ang kalibre .45 nga armas base sa nakuha sa Scene of the crime operarives (Soco) Northern Mindanao.
Nakaangkon og samad sa ulo si Salaan lakip na sa iyang tiyan hinungdan sa hinanali nga kamatayon.
Nagsul-ob og jacket ug helmet ang drayber samtang ang nagpusil naka jacket usab ug nakamaskara, kinsa sakay sa motorsiklo nga kalabira human gitangtangan og cover ang maong motorsiklo. Lakip sa gitutokan nga motibo mao ang istrikto nga pag-implementar sa biktima sa pagpanguha og mga pasahero.
Sa pagsulat niini nga balita padayon pa ang kapulisan sa pagpangita sa maong mga suspetsado sa krimen.