MAKIGTAGBO si Konsehal George Goking ngadto na sa mga gasul provider lakip na sa City Price Coordinating Council (CPCC) human sa gipagawas nga warning sa Department of Trade and Industry (DTI) sa publiko sa paggamit og butane nga gitubilan og liquefied petroleum gas (LPG) ug uban pa.
Sa Facebook page sa DTI kauban ang CPCC sa siyudad, Bureau of Fire and Protection (BFP) niuban sa panawagan sa Department of Energy (DOE) sa pagpahimangno sa publiko.
Giingong sa bag-o lang nga panagtigom sa maong mga ahensiya, gipanawagan ang publiko sa paglikay niining naandan na ug i-report ang mga impormasiyon nga nasayran kalabot na niining ilegal nga refilling stations.
Sa pakighinabi kang Goking, tsirman sa CPCC, nga magtigom kini sila pagbalik aron hisgutan kining maong seryusong hisgutanan.
“Magpatawag ta siguro sa tanan mga gasul provider pud kay we want to know dayon sa CPCC pud aron malantaw unsay mahimo, kay basig kanang refill walay sakto nga ekipo kung simbako naay mahitabo ang basulon ang siyudad naman sab, kay delekado gyud,” matud ni Goking.
Nasayran nga giingong ang butane canister ginama sa tin o silver nga metal diin dili mamahimong tubilan og gas gawas sa butane samot na kung LPG tungod kay giingong delekado kaayo kini tungod na usab kay ang LPG kinahanglan og ibutang sa durable nga sudalanan.