BARUGAN ni Provincial Board Member Prexy Elipe sa Misamis Oriental ug suportado ang lakang ni Board Member Buboy Sabal nga gidili ug ibawal na gayud ang pagpasulod og basura gikan sa laing nasod sa Mindanao International Container Terminal (MICT), Lungsod sa Tagoloan, Probinsya sa Misamis Oriental.
Niaging Lunes, Hunyo 10, nga sesyon sa provincial board nga gi-preside ni Board Member Nancy Madjos, naghatag special report si Sabal kalabot sa sunod-sunod nga pagsulod sa basura sa probinsya sa Misamis Orienta.
Sa iyang personal nga baruganan ni Elipe, iyang gibutyag sa programa niini sa usa ka sibyaan sa radyo nga kung kaniadto iyang nahuna-huna nga i-recycle kini dili na kini pwedeng isulod ug dili ang lalawigan maoy hansakan og basura.
Suportado ni Elipe ang lakang sa Provincial Board nga himoan og halapad nga pagtoon nga dili na makasulod ang basura gikan sa laing nasod.
“Akong baruganan nga dili na pwede isulod ug ngano dalahon paman diri? Mas maayo nga bawalon ang pagpasulod sa laing nasod para sila mangita og solusyon sa ilang problema ug dili kita hansakan,” matud ni Elipe.
Dugang niini nga taliwala pa man kutob na siya karong katapusan sa Hunyo naglaom kining matagaan kini og halapad nga pagtoon diha sa hawanan sa Provincial Board.
“Naglaom ako nga mahimoan kini og halapad nga pagtoon nga dili na gyud makasulod ang basura dinhi sa atoa,” matud niini.
Human misulod ang basura sa South Korea, nisunod ang basura sa Australia ug uwahi sa Hong Kong diha sa MICT, ug niaging semana gibalik na pagkarga ang basura sa Hong Kong apan nagpabilin ang basura sa nasod sa South Korea ug Australia karon panahona human giingong aduna pay daghang giproseso sa papeles niini.