ESKINA pasulod sa may 6.5 ektarya nga relocation site diha sa Barangay Paknaan, siyudad sa Mandaue ang giingon nga nahimu na nga hagbunganan ug kuhaanan og ilegal nga drugas.
Hinungdan nga nag-una kini sa pabutangan og collapsible outpost nga adunay mga pulis nga mag-man ilabi na sa kagabhion ug sa weekend.
Kini human nga nakadawat og mga taho ang Mandaue City Police Office (MCPO) nga nahimo na kini nga bagsakan ug kuhaanan og shabu.
Matud ni Police Colonel Julian Entoma, ang director sa MCPO, base sa ilang nadawat nga na taho, mga naka-motorsiklo ang mohunong sa maong lugar sa kagabhion o kaadlawon ug dili ra molahus og sulod sa relocation site, dayon padagan palayo sa lugar human nga adunay moduol na kanila.
Mas nakompirmar kini human niangkon ang pipila ka mga dinakpan atol sa checkpoint sa Centro Police Station niadtong Sabado sa gabii, Hunyo 8, diin niabot og 16 ang mga nasikop tungod sa ilegal nga drugas.
Ang eskina sa relocation site sa Paknaan ang usa lang sa walo ka mga lugar nga labing una nga pabuntangan og balik sa collapsible outpost.
Lakip na niini ang usa ka lugar diha sa Barangay Umapad, duol sa usa ka pribado nga unibersidad duol sa first Mactan bridge, duol sa National Shrine of St. Joseph sa Barangay Centro, laing lugar sa Barangay Jagobiao crossing padung Canduman, ug sa Canduman area.
Pabutangan usab ang lugar sa may dalan A.S Fortuna sa Barangay Banilad, ug sa Highway crossing sa dan A.S. Fortuna.
Isunod unya dayon ang lugar diha sa may dalan Zuellig, duol sa mga dagkong hotel sa may North Reclamation Area.
Mapahimutang na kini sa dili pa mahuman ning semanaha, dugang ni Entoma.
“Sa gihimo nga pagsusi, nakita nga nahimo kini nga strategic area alang sa maong mamalitay ug mamaligyaay og drugas, kay dali kanila ang pagsibat, padung sa probinsya, agi sa Cansaga bridge, ang padung usab sa Lapu-Lapu, o sa Mandaue proper ug ang pagpadulong sa Cebu City. Nabantayan gud sa uban nga mga dili taga dira sa dapit ang mohunong ug dili usab mosulod, naa lang moduol dayon sibat na dayon,” pagpasabot ni Entoma.
Dili lang batok sa mga nalambigit sa ginadili nga drugas ang pagpahimutang sa collapsible outpost, apan isip na usab proactive measure pagpakgang sa uban pa nga kremin, sama sa tulis. (FMD)