LAMI kaayo akong kundisyon samtang gadukdok ko ning akong kulom.
Kinsa may di malipay nga nidaug gud ang atong manok sa Cebu sa Bb. Pilipinas 2019.
Sakto gyud ang atong fearless forecast sa Superbalita Laysho no nga si Gazini Ganados ang mopresentar sa Pilipinas sa Miss Universe Philippines. Pakpak sad mo diha uy. Haha...
Ang tanang mga pageant enthusiasts sa Cebu nga atong nahinabi nga napatik sa Super Ka niadtong Huwebes sa Superbalita puros nitag-an nga modaug si Gazini.
Sagad gud nila ilang nakauban si Gazini sa KF (Kagandang Flores) beauty camp ug saksi kuno sila sa dedikasyon ni Gazini.
Apan kuryuso lang, unsa kahay koneksyon sa pangan ni Gazini sa tindahan sa una sa Colon nga Gazini Plaza way back 1980s? Diha kaha gikuha iyang pangan? Ma-interbyu kaha nato si Gazini? Abangan!
Kinsay una?
Silang Maria Paula Bacus Espina (Eat Bulaga Super Sireyna grand winner ug Queen Philippines Int’l) ug Angel Dakay (Bb. Toledo 2014) ang mas specific sa ilang tubag sa atong fearless forecast nga si Gazini ang modaug sa Miss Universe Philippines.
Mao na nay bag-ong tawag karon sa maong titulo. Dili na siya Bb. Pilipinas Universe, kundi Miss Universe Philippines.
Sakto sad tong ni-comment sa akong Chikoy Aguiluz Facebook nga dili si Gazini ang unang Cebuana nga ni-compete sa Miss Universe.
Kay duna nay laing Cebuana nga naka-compete sad sa una sa Miss Universe. Kinsa?
Ang 68-anyos nga lola sa “Nang Ngumiti ang Langit” nga si Pilar Pilapil nga taga-Liloan dihang nidaug sad siya niadtong 1967 sa Bb. Pilipinas.
Karong adlawa mosamot pa gyud tingali ni kalami akong kundisyon inig daug sa Toronto Raptors. Moduwa na ra ba kuno si Durant. Eng-eng-eng. Bring it on! Haha...
Ako diay i-greet akong waswit nga nagsaulog sa iyang birthday karong adlawa. Masuko ra ba nig dili i-greet. Mao diay lami kay dunay pakal. Happy b’day mommy Abing from Arbel and Dadi Troy! Labyu! Hehe...