NAGSUGOD na ang eskuwela sa halos tanang pribadong tulunghaan karong semanaha.
Apan may pipila pa nga gisagad gayud ang bakasyon kay sa Hunyo 17 pa ang ilang pormal nga pag-abli.
Sa akong tan-aw, medyo nigamay ang nagtungha sa pribadong eskuwelahan karon kung itandi sa niaging tuig tungod sa pagmahal sa matrikula.
Hasta ang mga magtutudlo namalhin na sa publikong eskuwelahan ilabi na sa balitang moabot og P42 mil ang ilang suweldo matag bulan.
Ang problema kay nagkulang gihapon ang lawak eskuwelahan sa kadaghan sa kabataan nga maoy gikasakit sa ulo sa mga opisyal sa Department of Education (DepEd).
Bisan dako kaayo ang pundo sa nasudnong badyet nga gigahin sa sektor sa edukasyon, kulangon gihapon kini sa panginahanglan ilabi na sa lugar nga naigo sa gubat ug katalagman sama sa Marawi, Tawi-Tawi ug Leyte.
Dili ikalimod nga nahimong prayoridad sa yanong Pinoy ang edukasyon busa moabot og 90-94% ang “literacy rate” sa nasud.
Mituo kita sa panultion nga dili makawat ni bisan kinsa ang kaalam sa atong kabataan nga gikan sa edukasyon.
Mao kini ang yawi sa paghaw-as sa kalisud sa kadaghanan sa tibuok kalibutan.
Apan atong hinumdoman nga dili lang sa upat ka lawak sa tulunghaan makakuha’g kaalam ang bata kon dili sa pakigsandurot niya sa uban.
Ang dila sa kaalam magsugod sa mga ginikanan. Kita nga mga ginikanan ang magkadlit sa tinguha nga makaangkon og dila sa kaalam ang atong mga anak.
Busa dili kita maluya sa pagpataas sa interes sa bata nga motungha ug paghatag kanila sa hataas nga edukasyon nga kaya sa atong bulsa.
Mao kini ang kaalam sa hitsura sa usa ka dilang kalayo nga nikunsad sa ulo sa mga apostoles ni Jesus sa pangilin nga gitawag og “Pentecost” o ika-50 ka adlaw human siya nabanhaw.
Napuno sa kahadlok nga nagtipon sa usa ka lawak ang mga sumusunod ni Jesus ug sa takulahaw lamang may mga dila sa kalayo nga nikunsad sa ilang mga ulo.
Gitawag kini sa teyolohiya nga Espiritu Santo nga maoy naghatag og talagsaong kalinaw, kalig-on ug kahibalo sa mga apostoles nga magsangyaw sa maayong balita sa pagkabanhaw sa tibuok kalibutan.
Mao usab kini nga dila sa kaalam nga nakamugna sa modernong teknolohiya ug daghang butang nga nakapalambo sa kinabuhi sa katawhan sa kalibutan. Naa dinhi ang paglambo sa siyensiya, medisina, teknolohiya, kultura, edukasyon, ug uban pa.
Subo lang paminawon nga gikan usab niini nga kaalam ang teknolohiya sa pagguba sa kalibutan sama sa armas nukleyar, kemikal nga pamatay sa tawo, pag-abuso sa kinaiyahan, pagpanglupig sa uban, ug pagpangilog og teritoryo.
Gigamit ang kaalam sa daghang lideres sa kalibutan aron makakamkam sa daghang bahandi ug magpabilin sa puwesto bisan kung nagkagidlaw ang kahimtang sa kadaghanan.
Busa isip mga ginikanan atoa kanunay’ng ipahinumdom sa atong mga anak nga ang kaalam sa edukasyon gasa sa kahitas-an alang sa kalamboan sa kaugalingon, pamilya, katilingban ug kalibutan ug dili sa pagguba niini.