MIDSAYAP, North Cotabato -- Patay ang usa ka pugante samtang sikpaw sab ang iyang kauban human sa nahitabong pinusilay sa mga awtoridad alas 10:40 sa buntag, Dominggo, Hunyo 9.
Naila ang napatay nga si Thorag Sandalan Sabal alyas Erick Pasanggalan samtang ang nadakpan si Nasser Makabangen Usman.
Nasayran gikan kang North Cotabato Police Provincial Office director Colonel Maximo Layugan nga gironda sa hiniusang puwersa sa kapulisan ug 34th Infantry Battalion, Philippine Army ang gitagoan sa mga suspek sa Brgy. Olandang sa lungsod.
Apan nisukol si Sabal ug nakigpinusilay sa mga awtoridad hinungdan nga napatay siya.
Nasayran nga si Sabal nipuga sa Maguindanao Provincial Jail sa dakbayan sa Cotabato niadtong Mayo 24, 2018, uban ang lain pang unom ka mga piniriso.
Ang suspek nag-atubang og mga kaso nga multiple murder, multiple frustrated murder, illegal drugs ug illegal possession of firearms.
Nakuha sa posisyon ni Sabal ang usa ka kalibre .45 nga pistola samtang .38 revolver sab gikan Usman, mga bala, shabu ug drug paraphernalia.
Patay nga lawas ni Sabal gikuha gilayon sa iyang pamilya samtang gibalhog sa selda sa Midsayap Municipal Police Station si Usman.
Gitakda siyang pasakaan og kasong paglapas sa Republic Act (RA) 10591 (Comprehensive Law on Firearms and Ammunition) ug RA 9165 o Comprehensive Dangerous Drugs Act of 2002. (Edgar E. Fuerzas)