GITAWAG nga pangilad ni Satanas ni Pastor Apollo Quiboloy sa Kingdom of Jesus Christ The Name Above Every Name Inc., ang Kabus Padatoon (Kapa) Ministry International, Inc.
Sa iyang official statement pinaagi sa usa ka video, si Quiboloy nangisog ug nagsulting wa gyud siya kauyon sa gihimo ni Pastor Joel Apolinario sa Kapa nga gigamit ang pulong ug ngalan sa Diyos sa iyang pagpangilad sa katawhan.
“Kamong mga miyembro sa Kapa ayaw mo kasuko sa akoa. Ako nag-ampo nga malamdagan mo sa akong krusada,” ni Quiboloy.
Gikaitok ni Quiboloy ang paggamit ni Apolinario sa ngalan sa Diyos ug pagtawag sa iyang kaugalingon nga pastor.
“Kung pastor ka nagdala ka sa pulong sa Diyos, gipadala ka, means mangluluwas ka. May otoridad ka sa kaluwasan sa tawo.”
Gisaway sab ni Quiboloy ang suma pa pagsaad ni Apolinario nga maluwas bugti sa pag-miyembro sa ilang grupo.
“Naa ba koy gisaadto ninyo nga padatuon ta mo? Misaad ba ko nga moanhi mo tagaan ta mo og kuwarta aron maluwas mo? Akong saad kaninyo pag maminaw mo, paghinulsol,” ni Quiboloy.
Ni Quiboloy nga ang pagpanghilabot niya sa isyu tungod sa “espiritwal” diin mibuhi sab siya’g pahayag nga kinsa mang mogamit sa ngalan sa Diyos aron makapangilad siya gyud ang atubangon.
“Akong trabaho espiritwal. Kung nangilad ka gamit ang pulong sa Diyos, gigamit ang kaluwasan, bantay ka sa akoa! Ibagdok gyud taka sa impiyerno, mao na akong isyu!”
Ni Quiboloy di siya babag sa kinsa mang buot maharuhay ang kahimtang sa kinabuhi, tuod man giampo niya nga matag-Pinoy molambo ang kinabuhi.
Dugang sa pastor nga di sab angay kwestiyunon ang mando ni Presidente Rodrigo Duterte ngadto sa NBI ug CIDG nga pasirhan ang mga money investment scheme nga nagdala sa ponzi scheme.
“Ka-bright anang presidente, kabalo na siya sa iyang gihimo. Kabalo siya nga way ponzi scheme nga milambo. Inig abot sa panahon nga mo-collapse ng tanan, kinsang problema? Sa gobyerno gihapon.”
Dugang niya, “akong giampo nga mouswag mong tanan sa paagi nga maayo ug kabutbot-on sa amahan.”