KAPA. Kabus Padatuon (Kapa), usa ka pundok nga nagdala sa ngan Ginoo nga gitawag nga Community Ministry International, Inc. nagsugod didto General Santos City ug mikatap sa mga dakbayan sa Mindanao nga karon miabot na sa Compostela, Cebu.
Ang mga opisyales sa mga kooperatiba didto sa Mindanao naguol ug nagubot tungod kay ang kadaghanan sa ilang mga sakop nibiya kay mas dako ang ilang kitaon sa Kapa kay sa kooperatiba. Ang mga lokal nga opisyales sa General Santos city way nahimo sa pagsumpo sa operasyon sa Kapa kay, matud pa, nahadlok.
Gani, bisan kon gikanselar na sa Securities and Exchange Commission ang rehistrasyon sa Kapa tungod kay ilegal ang ilang operasyon apan nagpakita og kaisog ang mga opisyales sa Kapa. Tungod sa kadako sa tubo (30 porsento) nga madawat sa giingon nga modonar sa ilang kwarta daghan ang nagpasakop.
Kining pamaagi sa Kapa di maglayo sa pyramiding, nga daghan ang nailad nga karon nahanaw na. Sama usab ni sa Ponzi scheme didto sa Amerika nga nanira kay napordoy dihang wala nay motunol og kwarta. Ang atong mga kaigsoonan nga nangayawat nga dali modaghan ang ilang kwarta maoy una nga nagpasakop ug di madugay mabiktima usab.
Mga kaigsoonan, hunahuna ninyo nga ang inyong kwarta nga gitunol usa ka donasyon. Sa ato pa mahimo ra nga di ihatag og balik ang inyong kwarta sa panahon nga maproblema na unya ang ilang pagpadagan sa inyong pundo. Sus, kon mao pa ni gibuhat sa uban nga simbahan o tinuhoan morag ang tanan mosimbo mohatag og dako nga amot.
Niadtong kaadlawon sa Sabado, Hunyo 8, giingon nga gitulis ug gisunog ang opisina sa Kapa diha sa lungsod sa Compostela. Morag gipasanginlan si Presidente Duterte sa taga Kapa tungod kay nahitabo ang sunog homan miawhag si Presidente Duterte nga ipasira ang Kapa tungod kay pyramiding ang ilang negosyo og kini ilegal.
Gani, si Compostela Mayor Joel Quiño miisyu og cease and desist order (CDO) tungod kay walay business permit ang Kapa. Apan nagpakita og kaarogante ang mga opisyales sa Kapa kay wa motuo sa CDO ni Mayor Quiño. Matud pa ni Mayor Quiño iyang pasakaan og kaso ang mga opisyales sa Kapa kay gigisi ang iyang closure order.
Hoy taga Kapa kon kinsa man ang inyong gisaligan ayaw kalimot nga nia mo sa Cebu. Kon nagtuo mo nga gisayonsayon ra ninyo ang mga opisyales sa General Santos city ug uban dapit sa Mindanao ayaw ninyo buhata dinhi sa Cebu. Sa inenglis pa “you are not above the law” tungod lang kay inyong gidala ang ngan sa Diyos.
Kining operasyon sa Kapa usa sa mga dako nga isyu atol sa General Assembly sa National Confederation of Cooperatives (NATCCO) nga gihisgutan tungod kay nakaapekto sa mga kooperatiba. Apan matud pa sa opisyales sa NATCCO nga wala silay mahimo tungod kay lig-on ang mga nagpaluyo sa Kapa.