TOM Jones...
Usa ka inilang personalidad sa natad sa musika kansang mga huni ug awit nahimong paborito sa kadaghanan.
Apan ang maong pangalan, mao usab karon ang sagad gihimong pasumbingay niadtong kaswal nga mga empleyado sa gobiyerno kinsa gituohan nga hangtod na lang sa Hunyo 30 ang ilang pagserbisyo.
Buot nilang ipasabot sa Tom Jones, “Tama na lang sa Hunyo.”
Tungod niini, daghan na karong nabalaka nga mawad-an sa ilang tagsatagsa ka trabaho ilabi na kadtong mga tinudlo sa kasamtangang administrasyon apan mahulipan sa ilang mga kaatbang sa pulitika.
Mao kini karon ang senaryo sa probinsiya sa Sugbo diin napanglantawan nang daan nga ubay-ubay gyung mga gipahimutang ni outgoing governor Hilario Davide III ang makulban sa kaldero sa higayon nga molingkod na si incoming governor Gwen Garcia.
Way kalahi-an sa dakbayan sa Sugbo. Daghan usab ang madala sa pagpanghagpat na unya ni incoming mayor Edgar Labella, ilabi na kadtong mga tawo ni outgoing mayor Tomas Osmena.
Sa dakbayan sa Lapu-lapu, si Pajo Barangay Captain Ahong Chan kinsa mao na usab ang molingkod pagkamayor human pakaginga ang mga Radaza sa niaging piniliay, nanaad na usab daan nga mopahigayon og pagpanghashas sa mga empleyado sa City Hall.
Dili man tuod makiangayon alang niadtong nagtinarong sa ilang mga trabaho, apan dili usab nato masalikway nga mao na kini ang reyalidad nga gisunod ug nahimong kabahin na sa atong panggobiyerno.
Komportabli silang makadumala sa renda sa ilang pangagamhanan uban sa mga tawo nga ilang gisaligan.
Busa sa pagkakaron, sama sa kanta ni Frank Sinatra nga My Way nga nagkanayon, “And now, the end is near, and so I face the final curtain.”
Sa laktod pagkasulti “weder-weder” lang.