LANGKATON og suway sa Toronto Raptors ang labing una nilang kampiyunato sulod mismo sa ilang balwarte sa ilang pag-host sa back-to-back defending champion Golden State Warriors sa Game 5 sa National Basketball Association (NBA) Finals sugod karong alas 9:00 sa buntag (RP time).
Ang Raptors nakaposte og 3-1 nga bintaha sa best-of-seven series human sila nakabira og duha ka sunodsunod nga kadaugan sa mismong tugkaran sa Warriors.
Sa ilang pagbalik sa ilang korte, ang Raptors ug ang ilang mga sumosunod naghinamhinam nang makatilaw og titulo sa labing unang higayon gikan sa ilang pagsulod sa liga niadtong 1995.
Apan sayod ang Raptors nga dili sila angayang magpadala sa ilang emosyon gumikan kay dako pang trabaho ang kinahanglan nilang tiwason.
“We haven’t done anything,” matod ni Raptors guard Kyle Lowry. “We’ve still got to get one more win. It’s the first to four. You’ve got champions coming in here and they’re going to play their butts off and play extremely hard.”
Ning kombatiha, adunay posibilidad nga moduwa na’g balik ang usa sa labing pambato sa Warriors nga si Kevin Durant, kinsa naangol sa Western Conference semi-finals batok sa Houston Rockets.
Sa labing unang higayon gikan sa iyang pagkaangol, si Durant miapil na’g ensayo sa Warriors kagahapon.
“He’s doing more today and then we’ll know more after that," matod ni Warriors coach Steve Kerr.
Dili ikalimod kon unsa ka dako ang kontribyusyon ni Durant sa Warriors apan ning higayuna, kinahanglan nilang mangandam naa o wala ang back-to-back Finals MVP.
“It’s just a matter of, ‘Can you win one basketball game right now? Can you go play an amazing 48 minutes, quiet this crowd that’s going to be probably unbelievable, and slow down a team that’s been playing amazing, especially these last two games, and just win one basketball game?’” batbat ni Warriors guard Stephen Curry.
“If we focus on that mission, our history kind of speaks for itself in terms of being able to get that done.”
Bisan unsa pa’y ipagawas sa Warriors nga kombati karon – naa o wala si Durant – seguradong andam ug determinado ang Raptors sa pag-alkontra niini. “We’re focused,” asoy sa bag-ong lider sa Raptors nga si Kawhi Leonard.
“We know that it doesn’t mean anything until someone has four wins.” (AP, ESL)