SECTIONS
Tuesday, August 20, 2019
SUPERBALITA CEBU

Migallen: Tungason ang latason sa Warriors

Taym pa

OPPS...

Duna pa man tuoy purohan, pero tungason na kaayo kining dalan nga latason sa defending champion Golden State Warriors una pa nila makab-ot ang ilang damgo nga three-peat.

Kini tungod kay 3-1 sila sa nagpadayon nga NBA finals series batok sa Toronto Raptors kinsa sa wala damha mao na hinuon ang midominar kanila.

Buot nakong ipasabot sa 3-1, mao nga ang Warriors nagkinahanglan og tulo ka daog samtang ang Raptors usa na lang aron hingpit nilang malangkat ang una nilang kampiyonato sa NBA.

Sa sinugdanan, daghan ang nanglantaw nga ang Warriors maoy nakabintaha batok sa Raptors. Lakip sa mihangop sa mga pangapas mao ang pIpila ka mga basketball analysts, labot na ang didto sa Estados Unidos.

Kadaghanan, apil na kita niini, ang nagtuo nga sa Game 6 tapuson sa Warriors ang serya. Pero sa dihang gihamok sa injuries ang Golden State, misugod og kadag-om ang maong mga panglantaw.

Midaog sila as Game 2 ug ang ilang kapildihan sa Game three gipahid ngadto sa pagpalta nila ni Klay Thompson ug Kevon Looney kinsa nakaangkon og slight injuries.

Apan sa Game 4 bisan pa og sa paghibalik sa duha, sa gihapon, yano silang gikusokuso sa mga batan-on ug gutom sa titulo nga Raptors. Kini maoy nagduot kanila sa peligrusong sitwasyon.

Durant

Pero taliwala ning tanan, wa gihapon mawad-i sa paglaom ang Warriors.

Nagkinahanglan karon og dinalian nga solusyon si Golden State coach Steve Kerr, ug ang pagpabalik ni Kevin Durant maoy ila karong gitinguha.

Si Durant, sukad niadtong Mayo 8 wa na makaduwa human makaangkon kini og angol sa iyang tuong bagtak.

Kagahapon, miapil na kini sa praktis sa Warriors. Dunay ice nga gihapin sa iyang batiis apan naobserbaran nga wala na kini magtaki-ong. Anaa na siya sa lineup bisan tuod og nagkinahanglan pa og dugang obserbasyon.

Pero sa gihapon dili garantiya nga ang paghibalik sa two-time Finals MVP makaluwas sa Warriors. Sulod sa usa ka buwan na kapin nga wa makaduwa si Durant ug daghan pag taya nga tangtangonon aron maulian siya sa iyang dinuwaan.

Sa duha nila ka duwa sa regular season, bisan pa man og diha sa Durant, wa makadaug ang Warriors. Sa una nilang panag-engkwentro, si Durant mipugnit og 51 puntos ug sa ikaduha aduna usab kini 30 kapin pero pildi gihapon sila.

Sa ato pa, dili lang ang tapad sa mga players maoy atong lantawon kon dili angay usab natong tutokan ang coaching ability sa matag habig.

Wa kaha malupig si Kerr sa rookie coach sa Raptors nga si Nick Nurse?

Sa Game 4, nag-usab-usab ang templada sa depensa sa Raptors. Nag box-and-one si Fred VanVleet ngadto ni Steph Curry samtang ang laing upat anaa nag-zona pero sa higayon nga anaa na sab si Thompson, mobalik sila sa ilang man-to-man defense apan adunay bisan usa nila nga mokalit pag-zona depende sa maduol sa sitwasyon.

Sa opensa, wa usab mosabay sa dinuwaan sa Warriors ang Raptors nga perming magpakusog bisan pa man og mas bata-bata pa sila og tuhod.

Gutom man tuod sa titulo, apan dili sila gigil. Kredito ngadto sa liderato sa kanhi pambato sa San Antonio Spurs nga si Kawhi Leonard kinsa beterano na usab kon finals appearance ang hisgutan.

Sa gikaingon ko na sa unahan, aduna pa man tuoy kahigayonan ang Warriors apan tungason na kini kaayo ug nagkinahanglan sila og dakong milagro nga magsugod karong buntag. (jun.migallen22@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph