GIKATAKDANG mogikan na karong adlawa si Aston Palicte uban sa iyang team paingon sa Chiba City, Japan alang sa iyang world title fight batok sa haponanon nga si Kazuto Ioka.
Ilogan ni Palicte ug Ioka ang nabakanting World Boxing Organization (WBO) superflyweight title karong Hunyo 19.
Si Palicte, 28-anyos, adunay record nga 25-2-2 nga may 21 ka knockouts ug may reputasyon nga mopaundang sa iyang kontra.
Apan ning higayona, ang iyang manager nga si Jason Soong, mibutyag nga wa sa ilang plano ang pagpaundang ni Ioka sa sayong mga round.
Kini tungod kay sayod sila kon unsa usab ka peligro ang 30-anyos nga Ioka kinsa adunay 23-2 nga record ug 13 niini gipang-knockout.
Gawas niini, si Ioka eksperiyensiya na usab sa mga world title fight ug gani usa kini ka three-division champion.
Ang duha ka pildi ni Ioka ubos lang sa split decision sa Thailander nga si Amnat Ruenroeng ug ingon man sa majority decision sa mga kamot ni four-division champion Donnie “Ahas” Nietes.
Gihulagway ni Soong nga taas kaayo ang tsansa sa iyang batos nga mouli kini sa nasod nga dala na ang titulo.
Ang Sugboanon nga si Rodel Mayol, kanhi usab wordl champion ug karon usa na ka boxing trainer nga atoa mabasehan sa Estados Unidos maoy headcoach ni Palicte.
Wala makadumala si Mayol og sayo sa ensayo ni Palicte sanglit mao usab kini ang nag-atiman nila ni Jhack Tepora ug Marlon Tapales kinsa bag-ohay nang midaog sa ilang tagsatagsa ka mga away didto Soboba Casino Resort SA San Jacinto, California
Si Tapales mipaundang sa Mexicanong si Roberto Castaneda sulod lang sa tulo ka round samtang si Tepora yanong mibukbok ni Jose Luis Gallego aron angkunon ang unanimous decision.
Nagsugod sa hugot niyang training camp si Palicte didto sa Manila niadtong Abril ug mibalhin kini didto sa Baguio City aron pag-anad usab sa bugnaw nga klima sa Japan. (JBM)