NAKIGTAMBAYAYONG og eksperto ang Maharlika Pilipinas Basketball League (MPBL) alang sa ilang tinguha nga pakgangon ang giingong game fixing nga nahitabo ning maong regional league.
Mismong si Senator Manny Pacquiao, kinsa maoy utok sa pagkatukod sa liga, ang misaad nga iyang sumpuon kining maong salawayong gimbuhaton.
“Gusto kong pangalagaan ang MPBL. Gusto kong ang tao hindi niloloko. Gusto ko ang game laging competitive. Hindi yung maraming hokus-pokus. Ayaw kong niloloko natin yung sambayanang Pilipino. Wina-warningan ko lang baka pagdating ng panahon mawala na kayo na parang bula,” pasabot ni Pacquiao sa interbyu sa Spin.ph.
Adunay dili kumpirmadong mga taho nga miabot sa MPBL Commissioner’s Office kabahin sa alegasyon sa game fixing.
Matod ni Pacquiao nga mohatag siya og pahalipay sa mga tawo nga makahatag kaniya og kamatuoran kabahin sa game fixing.
“May mga grupo na tayo na expert dyan para magsubaybay sa mga players na kahinahinala, mga taong pumapasok outside the league,” dugang ni Pacquiao
Mokabat ngadto sa 31 na ka mga teams ang mosalmot sa ikatulong season sa maong lega.
Bisan tuod og ang usa ka franchise nga mao ang mandaluyong wala na, apan laing unom ka mga teams ang interesadong mihulip.
Kini mao ang Bicol, Mindoro, SOCCKSARGEN, Iloilo, Bacolod ug Nueva Ecija.
Kon way mga kakulian, gikatakda nga ugmang adlawa sugdan na ang ikatulong season diha sa Mall of Asia Arena. (ESL)