GIILA sa Social Security System (SSS) sa rehiyon ang Solid Earth Development Corp. (SEDC) pinaagi sa pagtanyag sa Balikat ng Bayan Award isip Top Employer sa 2018 tungod sa dako nga tampo niini sa pagpatuman sa mandato sa SSS.
Gipasidunggan sab ang SEDC sa susamang pag-ila sa kategoriyang small-micro employer sa SSS Talisay Branch nga naglangkob sa San Fernando asa namatigayon ang kompanya.
Gitumbok sa SSS ang pagtamod sa SEDC sa balaud sa SSS kabahin sa nalangkoban, pagkolekta ug paghatag sa mga benepisyo, tukma sa pagpadala sa mga taho, ug pagsuporta sa mga programa sa aehnsiya
Gitunol ang mga pasidungog nila ni Helen C. Solito, senior vice president sa Visayas Group, ug Atty. Alberto L. Montalbo, acting vice president sa Visayas Central 1 Division, atol sa pagsaulog pagka-Agosto 28 sa SSS sa ika-61 nga anibersaryo niini didto sa City Sports Club.
Gidawat gikan nila ang regional award nila ni Mitzie Almira I. Carin, tagduma sa human resources and administration sa SEDC, uban ni Shieva Saavedra sa HR, ug ang branch level award gikan kang acting Talisay branch head Janice L. Caballes.
Gipasigarbo ni Atty. Dennis B. Tenefrancia, pangulo sa kompanya, ang pasidungog nga mipakita sa kinaiya sa SEDC sa paghatag og dakong bili sa mga kawani.
Mao sab ang gipalanog nila Hiroyuki Sakakibara, direktor sa SEDC, ug sa kaubang technical adviser Taro Sumi samtang gipadayag nila ang ilang pasalig alang sa kaayuhan sa mga kawani isip mga mahinungdanong bahin sa operasyon sa kompanya.
Gipadayag sa Balikat ng Bayan ang “mga abagang kasandigan panahon sa panginahanglan,” kinaiya sa SSS ug mga kaalayon sa pribadong sektor sa pagpanalipod sa social security. (PR)