GIPASAKAAN nag duha ka mga kasong murder ug duha ka ihap sa kasong attempted murder ang suspek sa pagpatay sa usa ka barista ug sa babaying cashier sa Good Cup Coffee sa dalan F. Ramos, Barangay Cogon Ramos, Siyudad sa Sugbo niadtong Abril 11, 2019.
Ang gipasakaan og kaso sa Abellana Police Station mao si Hans Jurgen Ruelan Dingcong, 37, taga 88 Hills compound, Barangay Guadalupe, Siyudad sa Sugbo.
Matod ni Police Major Eduardo Sanchez, hepe sa Abellana Police Station, si Dingcong positibong gitudlo sa usa ka balot vendor sa dihang gipakitaan siya sa hulagway.
“Na file na namo ang kaso ganinang buntag (June 10). Regular filing na after nga positive siya nga giila sa witness,” matod ni Sanchez. Giingong managkaila sila ni John Michael Hermoso ug Dingcong human nga ang kanhi hinigugma sa nahauna maoy uyab sa suspek.
Love triangle
Matod ni Police Brigadier General Debold Sinas nga love triangle ang motibo sa pagpatay ug naangin lang si Kis Ramos, cashier.
Sa imbestigasyon nasuta nga bisan nagkabuwag na silang Hermoso ug uyab ni Dingcong, nahigugma pa gihapon kini.
Giingong di madawat sa suspek nga maoy nagtukmod sa paghimo niini sa krimen.
Apan gihimakak kini sa babaye sa dihang gipatawag ni sa mga imbestigador.
“Kining girlfriend aning suspect girlfriend pud ni John Michael nga accordingly in love pud ang girl. So, nagselos so mao na ang story, when the interview was conducted she denied it,” matod ni Sinas.
Giingong nanghimakak si Dingcong kay matod pa naa sila sa casino atol sa hitabo.
Apan sa dihang gipasubay ang mga kuha sa CCTV sa casino, wa siya makita didto. (AYB)