WA MOSUGOT si Gobernador Hilario Davide III nga isibog sa mas sayo nga adlaw ang turnover ceremony sa importanteng mga dokumento sa Kapitolyo ngadto kang Governor-elect Gwendolyn Garcia.
Kini taliwala sa hangyo sa transition team ni Garcia nga isibog kini sa Hunyo 27 inay nga sa Hunyo 28.
Matod ni Davide, duna na siyay na-una nga mga commitment sa Hunyo 27 ug di niya kini kabalibaran o kanselahon.
Tinguhang ipasayo sa Garcia transition team ang turnover aron masusi nila daan ang mga dokumento ug matubag pa sa hingtungdang department head ubos sa Davide administration kon duna silay mga pangutana o makit-ang irregular.
Ang Local Governance Transition Team nilang Davide ug Garcia inisyal nang nagkatigom niadtong Hunyo 4 ug Hunyo 7 sa miaging semana aron tukion isip kabahin sa pagpangandam sa turnover.
“Naa na man ko’y mga commitment gud sa (June) 27. I cannot change kay ma-ikog pud ko sa akong gisaaran nga motambong ta. So, on the 28th ta,” pasabot ni Davide.
Giingong duna sa’y kaugalingong commitments si Garcia sa Hunyo 28 hinungdan nga nihangyo nga isibog ang turnover.
Gipadayag ni Davide nga dunay lagda ang Department of Interior and Local Government (DILG) bahin sa turnover.
Base sa DILG Memorandum Circular 2019-39, i-schedule ang turnover sa Hunyo 30. Apan tungod kay natunong kini og Dominggo, gipili sa kampo ni Davide nga sa Hunyo 28, Biyernes, kini himuon.
“We will stick to our schedule. Mao ma’y ingon pud sa DILG nga kami ang agdon,” padayag sa gobernador.
Nanamilit
Baynte ka adlaw sa di pa mapupos ang iyang termino pagka-gobernador sa Sugbo, nanamilit na si Davide sa mga empleyado sa Kapitolyo.
Gawas sa pagpanamilit, nagpasalamat usab siya kanila sa suporta ug respeto nga gipakita ngadto kaniya.
Nangayo sab siyag pasaylo sa mga wa makauyon sa mga lakang nga iyang nahimo.
Kutob na lang sa Hunyo 30 sa udto mamahimong gobernador sa Sugbo si Davide, mopuli na kaniya si Garcia.
Sa pagtuo nga wa na unya siya’y laing higayon nga ma-address ang mga kawani sa Kapitolyo, si Davide nitambong sa flag-raising ceremony sa Lunes sa buntag.
Personal siya nga nipadangat sa iyang pasalamat ngadto sa mga empleyado, mga department head ug uban pang opisyal sa provincial government.
Gipasalamatan sila sa gobernador tungod sa ilang serbisyo nga nakatabang usab sa iyang pagdumala sa Kapitolyo.
Nagpasalamat usab si Davide sa respeto ug kaayo nga gipakita nila ngadto kaniya sa milabay nga unom ka mga tuig nga pamunoan.
Si Davide dili ra hinuon mopalayo sa Kapitolyo kay igo man lang siya nga mobalhin og opisina sa iyang pag-asumir usab isip bise gobernador sa Sugbo sugod usab sa udto sa Hunyo 30.
“This will probably be the last time that I’ll be addressing you. So, let me take this opportunity to thank all of you for your service to the Province, for the respect and kindness you’ve shown me and of course your support and cooperation,” padayag ni Davide. (AZLG)