SA DAKBAYAN sa Lapu-Lapu, ang sentro sa kasaulogan sa paghandum sa ika-121 nga Independence Day sa Pilipinas karong tuiga, sumala sa taas nga opisyal sa National Historical Commission of the Philippines (NHCP).
Matod ni Dr. Rene Escalante, chairman sa NHCP, kabahin kini sa dakong selebrasyon sa simbahang Katoliko sa ika-500 nga anibersaryo sa pag-abot sa Kristiyanismo sa nasod.
Siya namahayag nga sa miaging tuig sa Kawit, Cavit ang sentro sa kasaulogan sa adlaw sa kaugalingnan agi og paghandum sa ika-150 nga birth anniversary ni anhing presidente Emilio Aguinaldo.
Sigon niya gamay ang kahigayonan nga makatambong sa selebrasyon si Presidente Rodrigo Duterte tungod sa cabinet meeting nga ipahigayon usa ka adlaw sa dili pa ang kalihokan karong Miyerkules, Hunyo 12.
Apan kon di kini makatunga, mopadala ang Presidente og cabinet secretary nga maoy morepresentar niya sa kasaulogan sa adlaw sa kaugalingnan nga himuon sa Liberty Shrine sa Barangay Mactan, siyudad sa Lapu-Lapu.
Samtang, sumala ni Escalante nga wa pay opisyal nga tubag ang Bangko Sentral ng Pilipinas (BSP) sa sugyot sa NHCP nga ibutang sa P2,000 bill ang dagway ni Lapulapu.
Siya nidugang nga gisugyot nila sa BSP ang pagpabalik sa kwarta nga papel nga tibuok P2,000 commemorative banknotes nga giisyu sa panahon ni kanhi presidente ug outgoing Manila City Mayor Joseph Estrada.
Sumala ni Escalante nga niduso sila sa maong sugyot, apan kinahanglan pa kini og tun-an og maayo sa BSP ug sa hingtungdang mga ahensiya sa gobiyerno.
Sugod karong Agusto 1, 2019, wala nay balor ang limited P100,000 ug P2,000 nga centennial commemorative banknotes subay sa kamandoan sa BSP niadtong 2017.