NAKADAWAT na ang kapin sa 30,000 ka senior citizens ug persons with disabilities (PWDs) sa dakbayan sa Lapu-Lapu sa ilang mid-year cash assistance karong tuiga niadtong, Dominggo ug Sabado, Hunyo 8 ug 9.
Niabot sa 25,626 ka senior citizens ug 4,593 ka mga PWDs ang nakadawat sa ilang pahalipay gikan sa kagamhanan sa dakbayan sa duha ka adlaw nga paghinatagay sa 30 ka mga barangay.
Sa mga nagkaidaiyang barangay hall nagdasok ang mga senior ug PWDs diin gipahigayon ang pagpanaghatag sa cash assistance.
Bugtong ang Gun-ob, Pusok ug Pajo ang nipahigayon sa ilang pagpanghatag sa Hoops Dome.
Sa kinatibuk-an nikabat sa P103,470,000 ang naapud-apod sa kagamhanan ngadto sa mga senior ug PWDs.
Tag P3,500 sa mga senior ug P3,000 sa mga PWD.
Gipasabot ni outgoing Lapu-Lapu City Mayor Paz Radaza nga pagtuman lang gayud sa iyang gisaad ngadto sa mga senior citizens ug PWD’s sa milabayng kampanya sa piniliay ang gibuhat nga pagpanghatag sa kagamhanan sa dakbayan.
Naglaom siya nga padayonon gihapon ang pagpanghatag sa umaabot bag-ong administrasyon sa dakbayan hilabi na sa buwan na usab unya sa Disyembre diin aduna usay madawat unta ang senior citizens ug PWDs. (GCM)