PANGUNAYAN og hilot ni Mayor-elect Edgardo Labella ang kasungian tali sa iyang duha ka alyado sa Barug PDP-Laban para sa kaayohan sa kinabag-an.
Si Labella, bag-ong naabot gikan sa kapin usa ka semana nga pagpahuway didto sa United States of Amerika, niingon nga iyang pakigtagbuan si outgoing City Councilor Pastor Alcover Jr., kinsa iyang gikabingkil si City Councilor-elect Niña Mabatid.
Gihulagway ni Labella nga dili makaayo sa ilang partido ug sa dakbayan sa Sugbo ang sige og tinubagay ni Alcover ug Mabatid sa social media.
Si Alcover nipasangil kang Mabatid nga ni-junk sa iyang mga kauban, nag-vote buying ug single voting, apan gipanghimakak sa outgoing barangay captain sa Mabolo.
Iyang gipadayag nga dili siya angay basulon ni Alcover sanglit pipila ra sa 46 ka barangay sa north district nga siya nasulod sa magic 8, busa nahulog si Alcover sa ika-13 nga dapit. (PAC)