TANANG mga sakop sa Drug Enforcement Unit sa 11 ka police stations sa Cebu City Police Office parelibuhan sa katungdanan.
Sila ipaubos sa re-training lakip na ang hepe sa Labangon Police Station human masikop sa buy bust operation ang usa ka pulis niadtong Biyernes sa gabii, Hunyo 7.
Matod ni Police Colonel Royina Garma, iyang ipatawag ang 11 ka mga police station commander alang sa emergency meeting aron ipahibawo ang pag review sa palisiya sa police operation procedure sa ilegal nga drugas.
Iyang nakita niya nga dali kaayo matintal ang pulis nga nadestino sa maong unit sanglit drugas ang ilang target.
Kini ang hinungdan nga ilang hulipan ang tanang sakop niini lakip na ang naa sa headquarters.
“Yes, it’s not only Labangon. In fact, this afternoon, June 10, nagpatawag ako ng emergency meeting with all station commanders and we will relieve and overhaul the whole CDEU. Even the headquarters na CDEU and we will review our policy in the conduct of police operations and at the same time the check and balance sa mga personnel namin. Kasi they are very vulnerable na ma tempt bitaw na mo commit og mga crimes or posible ma involved sa drugs,” matod ni Garma.
Hepe giapil
Lakip sa iyang pahulipan ang hepe sa Labangon nga si Police Major Keith Allen Andaya tungod sa command responsibility bisan kon apil siya sa pagpadakop sa iyang sakop. Kasamtangan nga ibutang si Andaya sa CCPO headquarters samtang nagpadayon ang imbestigasyon sa iyang mga sakop kaniya.
Sa Hunyo 15, aduna nay kasamtangan nga officer-in-charge nga ibutang si Garma sa Labangon police station.
Samtang ang mohulip nga hepe sa City Drug Enforcement Unit ang pangulo sa Special Weapons and Tactics (SWAT).
“He will be investigated and charged according to the Regional Director (Debold Sinas) command responsibility. Kasi yan whether you like it or not, he has to show proof that he personally supervised his people and its very difficult,” dugang ni Garma.
Kinsay mangulo
Ning bag-ong set up sa mga DEU officers sa matag police station, ang chief of police maoy team leader diin ang matag anti drug operation kinahanglan nga naa ang hepe sa usa ka estasyon.
Kon iyang masayran nga wa ang hepe, manubag niya kini ug iyang gibaharan nga mag atubang og tukmang kaso.
Gisugyot hinuon ni Police Brigadier General Debold Sinas kang Garma nga ipaubos sa moral recovery program ang maong mga pulis tungod sa posibilidad nga nakaon na sila sa sistema sa unit.
Naalarma na si Sinas sa gipangangkon ni Atillo sa imbestigasyon nga moabot na sa 30 gramos sa illegal nga drugas ang iyang na recycle sa gawas.
Sa impormasyo nga nakuha, ibaligya ni Atillo ang drugas sa tag usa ka libo ang gramo tungod sa panginahanglan niini sa kwarta gumikan kay siya ra ang nanarbaho.
Atol sa buy bust operation, nakuhaan si Atillo og usa ka dakong pakete sa gituohang shabu nga motimbang ang tanan og 15 gramos.