ANG National Bureau of Investigation (NBI) Central Visayas ug Philippine National Police ningsakmit sa mga dokumento gikan sa buhatan sa Kapa-Community Ministry International Inc. sa Barangay Poblacion, Compostela, Cebu, Lunes, Hunyo 10.
Kini human giluwatan ang usa ka search warrant ni Manila Regional Trial Court (RTC) Branch 20 Judge Marivic Umali batok sa Kapa tungod sa alegasyong nakalapas sa Securities Corporation Code of the Philippines.
Ang NBI 7 ug Regional Special Operations Group (RSOG) sa Police Regional Office (PRO) nakasakmit gikan sa buhatan sa usa ka blangko ug filled up nga application forms, membership certificates, ug bid of donations, ingon man monobloc chairs ug usa ka motorsiklo, matod ni NBI Special Investigator IV Bienvenido Panican.
“We are ordered to cease all instrument used by Kapa during their operations,” pasabot ni Panican.
Tanang items nga nakuha sa raid iadto ngadto sa korte nga niisyu sa warrant, nagkanayon si Panican. Matod ni Panican nga way taga Kapa nga ningpakita atol sa raid.
Matod ni Panican nga bisan tuod kon wa silay nasikop nga mga opisyal sa Kapa, ang NBI, sa pakigtambayayong sa Securities and Exchange Commission (SEC), mopasaka og kaso batok sa founder sa Kapa Joel Apolinario ug Kapa Cebu area manager Christopher Abad.
Matod ni Panican nga nagplano silang mopasaka og kasong kalapasan sa Section 8 ug 26, sa Republic Act No. 8799 kun Securities Regulation Code of the Philippines tungod sa pag-operate nga way lisensya gikan sa SEC.
“(They are) operating without a license because their license has been revoked by SEC last April 3, 2019 so they are illegally operating now,” pasabot ni Panican.
Sa Lunes, dungan nga search warrant ang giluwatan sa mga buhatan sa Kapa sa nasod.
Ang usa sa mga buhatan niini sa Kabisay-an nga naa sa Ormoc City gironda usab.
Mga kaso giandam
Mga kasong kriminal ang giandam na batok sa mga opisyal sa Kapa, nga gihulagway sa regulators sa kagamhanan nga nagpadagan sa labing dako nga investment scam sa nasod..
“We have already a case build-up. We are going to file the necessary charges against the pastor, against his men, against his directors, and against the defenders or those who are abetting and propagating this scheme,” nagkanayon si SEC Chairperson Emilio Aquino sai usa ka press conference sa Lunes.
Si Aquino niingon nga ang Kapa mas dako kay sa Aman Futures scam nga nakailad og P12 bilyunes gikan sa 15,000 ka mga tawo sa Visayas ug Mindanao.
Tambag ni Palma
Nipahimangno si Cebu Archbishop Jose Palma sa mga tawo nga mag-amping ug dili magpailad sa mga grupo nga modawat og investments.
Matod niya, di mawa nga may mga tawo nga mangilad sa uban aron makakwarta ug mogamit og mga pamaagi aron madani ang uban nga moapil sa grupo ug mobubo og puhunan.
“So, kita na lang paghunahuna because it’s not difficult to judge which ones are valid. But the point is to be cautious ug careful,” dugang ni Palma.
Alang niya katungdanan sa gobiyerno nga mangita og mga pamaagi aron masuta kon unsa nga mga grupo ang balido ug nisubay sa balaod.
“While generosity is always a virtue pero lisod man its also sad if you feel being fooled you know and being taken for a ride, taking advantage. Again, be extra careful lang,” dugang ni Palma.
Pulis miapil
Tulo ka mga pulis sa Sugbo ipatawag sa Police Regional Office 7 human masayri nga nagpamiyembro sa Kapa sa Compostela.
Mga empleyado ipaubos usab sa imbestigasyon human masunog ang ilang buhatan.
Wa lang una nganli ni PRO 7 Director Police Brigadier General Debold Sinas kinsa ang tulo ka mga pulis samtang wa pa ni maatubang ug mahinabi.
Iyang gitug-an nga nadestino ang tulo sa usa sa mga isla sa Sugbo.
Kwarta sa vault?
Gi-turnover na usab ang usa ka dakong vault nga gituohan nga adunay minilyon ka pesos nga kwarta ang sulod human wa madala sa gibana-bana 10 ka mga armadong tawo.
Ang nadala lang sa mga suspek ang gamay nga vault nga adunay sulod nga gibana-banang P5 million ngadto sa P7 million.
Nagduda si Sinas nga ang mga suspek nasayod asa gibutang ang kwarta sanglit di madeposito sa bangko ang kwarta nga gi donate sa mga miyembro tungod sa kamandoan sa SEC.
Imbestigahon ang 21 ka mga tenant ug in house nga kawani sa Kapa sanglit silang tanan persons of interest samtang wa pa silay matumbok nga suspek.
Organico misira
Boluntaryo nga nisira sa ilang sangang buhatan ang Organico Builders nga nahimutang sa Copenhagen East Building sa dalan A.C. Cortes, Barangay Cambaro, Mandaue City, Lunes, Hunyo 10.
Wa nay office staff ang nahibilin aron unta mapangayoan og pagpasabot sa pagsira gawas lang sa duha ka guwardiya nga mipalista sa mga miyembro sa ilang tagsa ka ngalan ug contact numbers aron nga matawagan sa management ilabi niadtong mokuha sa ilang pay-out.
Nidagsa ang mga miyembro sa maong dapit sa dihang nasayod sa kalambuan. Kadtong uban nga mokubra unta sa ilang pay-out nahibulong nga kasamtangan nga gi-hold una ang pag-release niini.
Gisugat na lang sila og pahibawo nga gi-print sa bond paper ug gipapilit sa gawas nga bahin sa maong buhatan nga “close for renovation.”
“Wa na mi magpaabot nga ipasira mi (Organico) parehas nahitabo sa KAPA ug ADA,” pahibawo sa security guard sa buhatan ngadto sa nabalaka nga members. (AYB, SCG, JJL, FVQ & SunStar Philippines)