GIPANGUNAYAN kagahapon sa buntag, Hunyo 11 (Martes) sa National Historical Commission of the Philippines ang pag-obserbar sa rehearsal alang sa pagsaulog sa ika-121 ka tuig nga pagka-deklarar sa adlaw sa kaugalingnan o Independence Day sa nasud karong adlawa diha sa Mactan Liberty Shrine sa Lapu-lapu City.
Ang paghatag og dungog sa bandila sa nasod, dungan ang pagkanta sa national anthem ug pipila ka mga pasidungog sa mga sakop sa military maoy modayan-dayan sa kalihukan.
Sa Mactan Liberty Shrine sa Lapu-lapu City, gisiguro sa NHCP nga masunod ang hamubo ug makasaysayon nga pagsaulog sa Independence Day.
Ang NHCP maoy migasto sa bandila nga gamiton sa kalihukan. Kini may 12 por 24 ka tiil ang gidak-on, ug lakip na usab niin ang insakton nga gitas-on ug gidak-on sa flag pole ug ingon man ang gitas-on sa pisi nga gamiton.
Gitun-an usab ang kon asa ug kanus-a mosulod ang representante ni presidente Rodrigo Duterte nga mao si Department of Education Secretary, Dr. Leonor Briones, ang pangulo sa NHCP, Dr. Rene Escalante, ug uban pang kadagkuan sa nagkadaiya nga ahensya sa gobyerno.
Gipaabot nga motambong usab si outgoing mayor sa syudad sa Lapu-lapu Paz Radaza.
Sukwahi sa nauna nga plano nga dinhi motambong si Duterte, gitug-an ni Alfonso nga adunay posibilidad nga sa ubang bahin sa nasud motambong ang pangulo.
“Part ito ng raise of awareness sa mga Pilipino na may dapat tayong’ abangan in two years time, so kaya ni-ready, nagkaroon ng mga malaking development dito sa Mactan liberty Shrine,” pasabot ni Alfonso.
Gipanlantawan sa tourism officer sa Lapu-lapu City Hembler Mendoza nga moabot sa 10 mil o kapin ka mga magtutudlo, kawani sa Lapu-lapu City hall, nagkadaiyang ahensya sa gobyerno, mga tinun-an, mga Oponganon ug mga turista ang mosaksi.
Molungtad og dul-an sa usa ka oras lang angaprograma nga sugdan sa alas 8 sa buntag.