GIHUWAT na lang sa Department of Health (DOH)-Central Visayas nga hingpit nang ilibkas sa kaulohang buhatan niini ang deklarasyon sa outbreak sa measles sa tibouk nasod.
Si DOH Central Visayas Director Jaime Bernadas nibutyag nga sa nakalabay nga duha ka semana namatikdan nila nga niminus na ang kaso sa tipdas sa rehiyon.
Base sa labing uwahi nga datus sa DOH, adunay 1,895 ka kaso sa tipdas sa Central Visayas gikan Enero hangtod Hunyo 8, 2019.
Adunay 14 nga natala nga namatay na gikan niini.
Kini 754 porsiyento nga taas kon itandi sa nakalabayng tuig nga aduna lay natala nga 222 ka kaso ug usa ang patay.
Nag-una sa gidaghanon sa kaso ang Dakbayan sa Lapu-Lapu (496 ka kaso); Dakbayan sa Sugbo (135); Dakbayan sa Talisay (105); Dakbayan sa Mandaue (73); ug Dakbayan sa Toledo (47).
Gipasabot ni Bernadas nga kasamtangan pa silang nagpahigayon og mapping aron masuta ang mga lugar nga aduna pa’y mga wala mahatagi sa bakuna sa tipdas.
Samtang si DOH-Central Visayas Assistant Regional Director Elenietta Gamolo nitug-an nga mopahigayon sila og school-based immunization.
“We want to ensure that these school children nga dili magkasakit sa measles. Atong ma-cut off ang transmission,” matod ni Gamolo.
Kini subay sa ilang pagkab-ot sa target nga 95% ang mahatagan og bakuna batok niini sa dili pa matapos ang buwan as Hunyo.
Ang screening ipahigayon sa mga tunghaan diin tan-awon kung si kinsa pa ang wala mahatagan sa maong bakuna. (Superbalita Cebu)