BISAN kon namahayag na si Presidente Rodrigo Duterte nga wa siya’y plano nga saulogan ang ika-500 nga anibersaryo sa Kristiyanismo sa Pilipinas sa 2021, nagtuo si Cebu Archbishop Jose Palma nga mausab pa ang hunahuna sa labing taas nga opisyal.
“Sometimes he says one thing, after sometime, he says another thing. So, karon to me this is not a closed issue and for me I just take it with you know, he said it now. I don’t know when the time comes, mauna pa siya og abot,” pahayag sa arsobispo sa artsidyosesis sa Sugbo dihang nahinabi sa mga tigbalita niadtong Lunes, Hunyo 10.
Si Duterte sa pakighinabi ni Apollo Quiboloy, founder ug lead pastor sa Kingdom of Jesus Christ niadtong Hunyo 7 didto sa siyudad sa Davao, namahayag nga wa siya’y plano nga saulogon ang ika-500 ka tuig nga pag-abot sa Kristiyanismo dinhi sa nasod.
Matod sa Presidente, ang pag-abot sa Kristiyanismo maoy sinugdanan sa pag-antos ug kasakit sa nasod.
Alang ni Duterte dili angay saulogon ang pag-abot sa mga Espanyol sa Pilipinas gumikan kay dinhi nasinati og sugod sa mga Pilipino ang imperyalismo sud sa 400 ka tuig.
“Five years of Christianity. Really? What’s so special?” pamulong ni Duterte sa maong pakighinabi, kinsa mas mosaulog pa sa adlaw sa kaugalingnan.
Sumala ni Palma ilang gitahod kon unsa man ang gisulti sa Presidente.
“But at any rate, this is a free country. If he wishes to attend, well and good. If not, this is his freedom. But I’m sure the Catholics would say we respect the President but our Catholicity does not depend on the president, it depends on the Lord,” dugang sa arsobispo.
Sigon niini saulogon nila ang dakong kalihokan bisan kon naa o wala ang Presidente.
Si Duterte niingon hinuon nga gawasnon ang mga Katoliko nga mosaulog sa ika-500 nga anibersaryo sa pag-abot sa Kristiyanismo sa Pilipinas.
Bisan sa negatibong pamahayag ni Duterte batok sa dakong kalihokan sa 2021, imbitaron gihapon kini sa simbahang Katoliko ingon si Palma.
“As a general rule, we always are a people who reach out and say Mr. President this is an important event. But it depends of course on his own choice. Sa karon its too long and too far to decide, anyway we just prepare kon duol na lang no. That’s the time we decide,” dugang ni Palma. (SCG)