Misulay pagdagit sa 2-anyos gikasohan na

GIPASAKAAN na og kasong kidnapping ang duha ka mga unang nagpatoong magtiayon human gisulayan pag-kidnap ang dos-anyos nga batang babaye niadtong Domingo, Hunyo 9, sa Barangay Bulua, Siyudad sa Cagayan de Oro.

Ang mga suspetsado naila nga sila si Dibaratan Dimapinto, 43, kinsa giingong residente sa Barangay Carmen ug usa ka kargador samtang ang kauban nga babaye naila nga si Michelle Canatoy, 38, dalaga, taga Talisay, Purok 7, Dakbayan sa Butuan.

Sa pakihinabi sa SunStar Superbalita kang Police Executive Master Sergeant Armand Hernaez sa Police Station 7 sa Bulua, gikabutyag nga gipasaka na ang kasong kidnapping batok sa mga suspetsado kinsa nagpatoo nga magtiayon.

“Na file na ang kaso, nagpatoo sila nga magtiayon modus nila para makuha ang bata, nakuha man sa ilang posisyon ang bata naa na pud gani mga biscuit, candy, diaper,” matud ni Hernaez.

Nasayran nga wala nabantayan sa usa ka inahan ang dos-anyos nga batang babaye samtang nagtimpla sa gi-order nga kape ug wala magdahom nga dunay dautang plano ang mga suspek kinsa niadtong tungora nangape usab sa pikas tindahan.

Samtang swerte na lamang nga nabantayan sa usa ka mamaligyaay og utan ang pagsulay sa pagdagit sa bata diin gi-alsa na kini ug naghilaka, hinungdan nga daling gitaho sa inahan rason nga naapas kini ug nailog gikan sa mga suspek sa dihang nag-atang na unta og bus.

Modus usab sa mga suspek ang paghaylo og mga pagkaon ngadto na sa mga biktima ug gani nagpakaron ingnon nga dunay deperensiya sa panghuna-huna sa dihang nasikop.

Gidugang pa niini nga dunay posibilidad nga ibaligya ang bata sa mga walay anak ug bisan sa mga pedophile. Gitan-aw pa usab sa kapulisan ang nakuhang ID sa usa ka bata diha sa ilang posisyon.

Padayon pa usab nga gipangita sa kapulisan ang giingong laing lima ka mga kauban niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph