NAKASINATI og pagsaka sa tubig ang Siyudad sa Cagayan de Oro human sa kusog nga pag-ulan niadtong Lunes, Hunyo 10.
Ubay-ubay ang mga estudyante nga natanggong ilabi na sa University of Science and Technology of Southern Philippines (USTP) ning Siyudad sa Cagayan de Oro.
Nasayran nga sagad nga makasinati og pagbaha mao ang mga dapit sama sa Barangay Kauswagan, Villarin Street sa Barangay Carmen, J.R. Borja Extension, Limketkai area ug uban pa nga mga barangay.
Sa pakighinabi sa SunStar Superbalita kang Nick Jabagat, tsirman sa City Disaster Risk Reduction and Management Department (CDRRMD), nga naatlan usab nga high tide hinungdan nga medyo paspas ang pagsaka sa tubig.
Giingong ubay-ubay nga mga estudyante ang natanggong human nga nisaka ang tubig hangtod sa tuhod nga bahin hinungdan nga ilang gipang-rescue.
“Na-timingan nga nag high tide ta, mga lapas sa tuhod, daghan daghan gyud ta mga estudyante sa USTP atong gitabangan pagpagawas naa pud sa Osmeña, mga alas 11 sa gabii niubos na gyud ang tubig,” matud ni Jabagat.
Gidugang pa usab niini nga dunay natumba nga kahoy sa may Barangay Nazareth, hinungdan nga dali usab nga gi-respondehan sa tinugyanan sa CDRRMD ilabi na nga nakababag kini sa dalan.
Swerteng walay natalang nasamdan ug uban pa atol sa maong kalit nga pagsaka sa tubig sa nagkadaiyang dapit sa Siyudad sa Cagayan de Oro.