GISUGYOT sa Kapitolyo Probinsyal nga mahimo na nga mobalik sa ilang lugar ang mga bakwit nga nag-usa na ka tuig sa Capitol Park sa Siyudad sa Cagayan de Oro.
Usa ka panagtigom ang gihimo sa kampo sa mga bakwit sa pagpangulo ni Datu Reynaldo Ayuma ug ngadto sa Misamis Oriental Provincial Legal Office pagpangulo ni abogado Neil Pacana; Provincial Social Welfare and Development Office sa pagpangulo ni Jhunleymar Abella ug Misamis Oriental Provincial Jail Warden Dominador Tagarda niadtong adlaw’ng Lunes, Hunyo 10, 2019.
Dinhi ilang gihisgotan ug gisugyot ang mga lakang suhestiyon aron makabalik na sa ilang lugar ang mga bakwit.
Giklaro sab nila og maayo ang mga isyu nga gakahitabo sa Capitol Park nga may kalambigitan sa pagpamuyo sa mga bakwit lakip na ang padayon nga suplay sa ilang panginahanglanon nga gihatag sa Kapitolyo Probinsyal.
Si Pacana nibutyag sa Sun.Star Superbalita nga ang panagtigom nga ilang gihimo aron unta nga makabalik na ang bakwit sa ilang lugar bisan dili mismo sa Sitio Kamansi, apan sa Barangay Banglay, Lungsod sa Lagonglong.
“Gihimo kini nato aron sila nga mahangyo pod nga mobalik na kay bisan kita maluoy pag-ayo sa ilang sitwasyon sa Capitol Park, luoy kaayo ang mga bata nga wala pa nangeskwela,” matud ni Pacana.
Dugang niini nga gisaad mismo ni Lagonglong Mayor Jap Puertas nga kung willing lang mobalik kining mga bakwit patukoran sila og mga kubo sa Banglay, aron didto makapamuyo ug makapananom susama sa ilang naandan ug makapamuhi og mga mananap.
Samtang mao pa sab sila magsugod kining ilang gihatag nga suplay karon panahona mao unta ang ilang ipadayon sa paghatod didto aron aduna silay suplay kung willing lang sila nga mobalhin ug mosango sa ilang hangyo.
“Kining suplay namo sa probinsya mao gihapon atong dalahon ug isuporta unta sa ilaha temporaryo aron makibhangan ug makakaon sila og sakto samtang mao pa sila magsugod,” matud ni Pacana.
Gani ang Provincial Veterenary Office andam unta sa paghatag og mananap kanila aron makasugod sa pagpamuhi.
Apan mibarog ang mga bakwit nga dili sila mobalik sa lungsod sa Lagonglong kung dili ghihapon didto sa Sitio Kamansi.
Ang ilang ancestral nga lugar nga ilang gipugos nga gikampohan karon sa mga sundalo.
Nagpabilin silang mibarog nga papahawaon ang mga sundalo sa ilang dapit kay sila maoy gakaipit sa giyera labina kon mag engwentro ang walhong grupo.
Gani nahatag na sa probinsya ang ilang hangyo nga himoan og tulay ang sapa nga dili nila maagian karong panahona.
“Usa lang gyod ang dili mahatag sa probinsya kining pagpahawa sa mga sundalo nga dili gyod nato mahimo kay ubos kita sa martial law, usa pa layo lang man sa ilaha dili man didto gyod sa ilang lugar pero ilang gikahadlokan nga maipit sila,” dugang ni Pacana.
Sa pagkakaron, magpabilin gihapon ang bakwit sa Capitol Park samtang padayon ang suporta sa kagamhanan sa probinsya sa pagpakaon kanila labina nga mao kini ang mando ni Misamis Oriental Governor Bambi Emano nga dili gyod kini sila pasagdan.
Gani sa 100 kapin ka bakwit nga nangabot niaging tuig sa dapit moabot nalamang sa 30 ang nagpabilin kay namalik na ang pipila sa Lagonglong.