DAGHANG bibo nga panghitabo karong semanaha.
Una ang pagdaog ni Miss Universe-Philippines Gazini Ganados.
Daghan ang nalipay nga bisaya na pod ang nakadaog karong tuiga human gisungkit ni Catriona Gray ang maong korona sa miaging tuig.
Ang nakanindot mao ang mga komentaryo sa mga fans.
Nganong Talisay City mag gidala niya nga taga-Bohol man na siya?
Nganong dili man Bohol iyang gidala, nganong Talisay City man?
Ang uban sab mikomentaryo og mao nang Talisay City gidala niya kay wala man na siya suportahi sa Bohol kay gipamolitika man tong miapil siya sa miaging Miss Bohol search.
Ang uban sab miingon nga wala gani siya suportahi sa kagamahanan sa Bohol.
Diha pay miingon nga sagpa nang pagdaog ni Gazini Ganados sa mga hurado sa Miss Bohol, wala nila padag-a sa Miss Bohol pero tua, midaog hinuon sa Miss Universe-Philippines.
Alang kanako, dili importante kon kinsa nga lugar ang gidala ni Gazini Ganados.
Ang importante nga midaog siya og gipakita niya ang iyang abilidad ug katakos sa maong natad sa kaanyag.
Dili sayon ang maong natad.
Ang tanang miapil sa maong natad pulos preparado nga modaog. Nag-andam sila sa ilang kaugalingon sa dugay nga panahon. Ang uban kanila mi-hire pa og professional trainer aron lang modako ang ilang tsansa nga modaog.
Apan gibuntog silang tanan ni Gazini Ganados. Kon duna may angay pasidunggan, angayan lang si Gazini Ganados mismo kay gihimo niya ang tanan nga modaog siya.
Hasta sab ang Labaw nga Makagagahom nga mihatag kaniya sa grasya panahon sa maong panagtigi sa kaanyag og kalantip sa panghuna-huna.
Laing bibo nga storya mao ang championship game sa Toronto Raptors og Golden State Warriors.
Labaw na kaayo sa puntos ang Toronto, gani usa ka daog na lang ang kulang og mo-champion na sila.
Daghan ang kulang sa Warriors kay si Stephen Curry lang ang padayon nga namuntos. Si Kevin Durant midula unta apan nabaldado sanglit nabikil na pod ang iyang tiil.
Kon dili mabikil si Clay Thomson, makatabang kini sa Warriors pinaagi sa mga 3-pointers niini.
Sa paghimo niining lindog, padayon pa gihapon ang paglabaw sa Warriors sa puntos.
Wala mo matingala nganong lami kan-on ang Vietnam Rice?
Ang Vietnam Rice maoy lig-on nato nga kompetensiya sa natad sa bugas humay sanglit barato ang Vietnam Rice kon ikomparar sa Philippine Rice.
Pero nganong lami man kan-on ang Vietnam Rice?
Unsay ilang gihimo o gi-abono sa maong bugas?
Simple lang.
Anha nila ilubong ang ilang patay sa basakan.
Sa unang paglubong, huwaton nila ang tulo ka tuig usa abrihan ang lungon. Anang panahona, bukog na lay nahibilin sa lungon.
Kon nagtakilid ang ulo sa wala o sa tuo, pasabot kuno, wala malipay ang namatay. Ang ilang buhaton, ilang tarongon ang bukog aron magtarong na ang porma sa ulo.
Kon magtalikod ang bukog, pasabot nga andam na ang patay nga motalikod sa iyang mga kabanay. Ila gihapon kini nga bahigon aron maghayang na kini.
Human nila kini himoa, ilubong na sab nila sa ikaduhang higayon ang patay diha gihapon sa basakan apan himoan na nila kini og nindot nga nitso.
Mao kini rason ngano nga daghang makita nga mga nitso (tombs) sa mga basakan sa Vietnam.
Tungod kini sa ilang pamaagi sa paglubong sa ilang mitaliwan na nga mga kabanay.
Ug basin mao kini hinungdan ngano nga lami kan-on ang Vietnam Rice.