DEAR Papa Joe,
Tawaga lang ko sa ngalan nga Angelica, 26 years old, naa nagpuyo sa Consolacion, Cebu.
Ang akong suliran kabahin sa akong pamilya. Dugay nang buwag ang akong mama ug papa pero akong mama may mga anak ni sila sa iyang kaipon sa una. Sa didto pa sila nagpuyo sa Bohol, ako ang nagsuporta nila. Bisan unsa na lang nga negusyo akong gisudlan para lang makasuporta ko nila.
Nisulod ko pag GRO para lang makatabang nila hangtod na nakaipon ko og Insik pero di pinakaslan. Gibalayan ko niya pero kinahanglan moundang ko sa akong trabaho. Mao nga nagnegusyo lang ko og gagmay sa online maoy akong gibuhat. Pinadad-an nako sila og tag P15,000 kada buwan pero kuwangon lang kay hasta akong mga half nga igsuon wa na motrabaho, nagsalig lang.
Hangtod nga nakabantay ang Insik, nibadlong nako mao nga ako nalang sila giingnan nga ako nalay mangumpra nila og groceries kada buwan. Karon nasuko na sila kay dawo daw ko. Nagsalig dato na ko. Sukad ato wa na ko nila tinggi ug namalhin sila og puyo nga wa ko masayud asa. Gi- block sad ko nila sa Facebook. Unsa may buhaton nako? Palihug tambagi ko.
ANGELICA
Angelica,
Sagdahi sila kay mga dagko na sila kay anak gud sila sa unang kaipon sa imong mama. Meaning manghud ka mao nga pasagdi sila nga makat-on sa pagpakabuhi og ilaha. Di nimo sila obligasyon nimo, gawas og wa silay paagi nga mabuhi. Imong mama pwede nimo siya suportahan pero sila motabang sab unta.
Anyway, maka-realize ra nang mga tawhana nga ing ana kon sila na mismo ang makapangita og trabaho ug maresponsable. Kon responsible na ka nga tawo, mas dali nimo sabton ang kinabuhi nga di diay sayon lang. Iampo lang sad sila nga okay sila ug ayaw lang sad kalain nila. Time heals. Daghang salamat.
PAPA JOE
(sa inyong tampo ipadala lang sa papajoesuperb@gmail.com)