ORMOC City--Kapin sa usa ka semana nga gi-atiman gibalik na ngadto sa dagat ang napalgan nga pawikan.
Si Ormoc City Mayor Richard Gomez maoy nangulo sa pagbuhi niini sa Bagsakan Center, niadtong Hunyo 6, 2019 aron nga makabalik ang mananap ngadto sa iyang natural habitat.
Sa sayo pa, ang female nga hawksbill species ang napalgan sa mananagat nga si Admdmer Iliada Sr, sa baybayon sa Barangay Ipil, Ormoc niadtong Mayo 30, 2019.
Wa magduha-duha si Iliada sa pagturn-over niini ngadto sa Fishiries Division sa City Agriculture Office.
Ang maong sea turtle anaa sa duha pa ka tuig ug gibana-bana nga adunay gibug-aton nga upat ka kilo.
Gi-tagging sa Fishiries Division ang pawikan sa wa pa pabuhi-i sa pagmatuod nga gibalik kini sa dagat sa mga nakakuha.
Si Gomez sa iyang bahin mipahinumdum nga gikinahanglang panalipdan ug ampingan ang bisan unsa nga sea creatures aron kapugngan ang pagkahurot niini.
Gani iyang giawhag ang tanan residente sa Ormoc o bisan asang lugar nga mo report dayun sa awtoridad kung dunay makit-an nga sea turtle aron masusi ang kondisyon. (JKDP)