WAY giisyu nga clearance ang National Historical Commission of the Philippines (NHCP) alang sa katukoran sa 20 ka andana nga Cebu Provincial Resource Center (CPRC).
Si Dr. Rene Escalante, chairman sa NHCP, nakugang dihang nahibaw-an gikan sa mga tigbalita sa Sugbo nga nagsugod na og ugmad ang WT Construction Inc. sud sa compound sa Kapitolyo diin pabarugon ang P1.3 bilyones nga edipisyo gumikan kay wa pormal nga nag-apply ang Cebu Provincial Government sa ilang buhatan aron maisyuhan og clearance.
Matod niya, base sa ilang standard procedures, aron maisyuhan og clearance ang kagamhanan sa lalawigan sa Sugbo, kinahanglan kini nga mosumitir og development plan sa dapit diin pabarugon ang estruktura nga ilang aprobahan.
Apan wa kini buhata sa Kapitolyo sukad nagkaestoryahanay sila ni Provincial Administrator Mark Tolentino duha ka tuig na ang nakalabay didto sa ilang buhatan sa kaulohan.
Siya niasoy perspective lang ang gipakita ni Tolentino ngadto nila ug dili ang formal nga offer alang sa pagpangayo og clearance.
“Kasi ang argumento ng Provincial Government is we cannot assume jurisdiction because it is a new construction,” pahayag ni Escalante dihang nahinabi sa mga tigbalita sa Sugbo.
Apan siya nipasabot nga ang isyu sa heritage community ang CPRC anha tukoron sud sa heritage buffer zone nga duol sa kasamtangang gibarugan sa Cebu Pronvicial Capitol building
Ang kapin 80 ka tuig nga Capitol Building gideklarar nga National Historical Landmark niadtong 2008.
“If you erect a building beside an important cultural property and something will happen to that building and it might affect the important, we will assume, we will regulate. I understand this building is quite near (Cebu Provincial Capitol),” dugang ni Escalante.
Si Governor-elect Gwendolyn Garcia daan nipahibawo nga wa siyay plano nga ipadayon ang pagpatukod sa CPRC tungod kay di siya ganahan nga magapos sa utang ang mga Sugbuanon sa pagbayad sa dakong kantidad nga giutang ni outgoing governor ug Vice Governor-elect Hilario Davide III.
Sa pangutana kon mahimo ba ang NHCP makaisyu og cease and desist order (CDO) batok sa Kapitolyo ug WTCI nga maoy nagtrabaho sa site development sud sa compound sa Kapitolyo, si Escalante niingon nga kinahanglan nga dunay reklamo batok niini.
Iya hinuon tahasan ang iyang mga sakop nga tan-awon ang gihimo nga pagpalambo sa lugar diin tukoron ang CPRC.
Si Escalante nidugang nga ang National Commission for Culture and the Arts (NCCA) ug ang National Museum ang implementor sa heritage.
Ubos sa Section 25 sa Article VII sa Republic Act 10066 kun National Cultural Heritage Act of 2009, kon ang physical integrity sa national cultural treasures o mahinungdanon nga cultural properties kay mabutang sa peligro nga maguba o mausab ang orihinal nga estado, ang hingtungdan nga ahensiya mahimo makaisyu og CDO pagpahunong sa pagtrabaho nga makaapekto sa cultural property.