ADUNA’Y gipang-apud-apod nga mga kurtina ang Department of Health (DOH) 7 nga maoy panagang sa mga estudyante batok dengue.
Ang maong mga kurtina gipanghatag kini sa mga tunghaan nga gitino sa mga rural health units (RHUs) nga aduna’y taas nga kaso sa dengue sa ilang barangay nga nahisakupan.
Matod ni Ma. Michelle Acosta, senior health program officer sa DOH 7, nga ang maong mga kurtina aduna’y sagol nga kemikal nga mopakgang sa mga lamok nga nagdala og dengue virus ug uban pang mga insekto.
Gitug-an ni Acosta nga kini safe nga gamiton ug wala’y ngil-ad nga epekto sa mga estudyante.
Naa sa 7,500 ka rulyo ang gitagana sa Central Visayas karong tuiga diin 10 ka rulyo ang nadawat sa matag RHU.
Ang usa ka rulyo anaa kini 20 ka metros nga kurtina.
Molungtad og hangtod sa lima ka tuig ang kemikal nga gibutang niini.
Gawas sa mga tunghaan, aduna usay mga ipanghatag nga mga kemikal ngadto sa mga RHU aron pag-awhag sa mga molupyo sa barangay nga dalhon ang ilang kurtina og didto kini ihumol.
Bisan pa man og nagpromote sila sa paggamit sa mga kemikal batok sa dengue, gitataw ni Acosta nga dili gyud kini abusohan.
“Search and destroy gyud ta,” dugang ni Acosta.
Ang pagpanghatag sa maong mga kurtina sa mga tunghaan nagsugod niadtong pagpahigayon sa Brigada Eskwela.
Base sa labing ulahing datos sa DOH 7, doble ang gidaghanon nga nakitang pagsaka sa kaso sa dengue ilabi na dinhi sa dakbayan sa Sugbo gikan sa Enero hangtod sa Hunyo 8 karong tuiga.
Aduna’y natala nga 1,162 ka kaso kon itandi sa 592 sa tuig 2018. Doble usab ang gidaghanon sa namatay.
Gikan sa upat sa tuig 2018, niabot na og walo karong tuiga.
Sa tibuok rehiyon, aduna na’y 7,996 ka mga kaso ug 50 na ang namatay karong 2019.
Sa 2018 adunay natala nga 2,683 ka kaso ug 21 ang namatay.
Gawas sa dakbayan sa Sugbo, nisunod ang Lapu-Lapu City (568 ka kaso), Mandaue (377), Dumaguete (251), Danao (230) ug lungsod sa Buenavista (199). (HBL)