NAG-abot abot na sa buhatan sa Cebu Provincial Commission on Elections (Comelec) ang mga Statement of Contribution and Expenditures (SOCE) sa mga kandidato sa provincial ug district level sa miaging eleksiyon.
Kini nunot sa nagkaduol na nga extended deadline sa submission niini karong Miyerkules, Hunyo 13.
Lakip sa mga nakaduso na sa ilang SOCE ang mga nakadaog nga mga kandidato pagka-kongresista nga silang Lolypop Ouano-Dizon sa 6th district, Janice Salimbangon sa 4th district ug Wilfredo Caminero sa 2nd district.
Si Caminero nideklarar nga nakagasto ug personal fund nga moabot sa P307,037.70. Moabot sa P68,607.70 ang iyang travel expenses atol sa kampaniya, P47, 187.00 ang iyang gibayad sa iyang mga campaigner, P60,243 sa pagpa-printa sa iyang campaign materials, P125 mil alang sa iyang poll watchers ug P6 mil sa iyang mga political meetings ug rally sa wala pa ang eleksiyon.
Sa iyang bahin, si Salimbangon nigasto ug P141,467.75 sa iyang kampaniya, diin P19,612.25 ang iyang travel expenses, p61,855 pagpa-printa ug campaign materials, P20 mil alang sa iyang mga abogado ug P40 mil pagprinta sa mga sample ballots.
Si Dizon nideklarar nga nakagasto ug P369,522.79 sa iyang kampaniya. May nadawat hinuon siya nga P150 mil nga in-kind contribution gikan sa iyang partido ug ang kapin sa P219 mil, gikan na sa iyang kaugalingong bulsa.
Ang iyang travel expenses niabot sa kapin P16,500, kapin sa P37 mil ang bayad sa iyang campaigners, dul-an sa P12 mil ang iyang communication o telephone expenses, P40 mil alang sa iyang mga adverstisement sa nagkadaiyang medium, P30 mil sa iyang mga abogado ug P37 mil pagpa-printa sa iyang sample ballots.
Sa laing bahin, ang napilding kandidato pagka-bise gobernador, nga si Daphne Salimbangon, nakaduso na usab sa iyang SOCE.
Gideklarar niya nga nakagasto siya ug p156,290.12 gikan sa kaugalingon niyang pondo. Kapin sa P43 mil ang iyang travel expenses, dul-an sa P13 mil ang communication expenses, ug P100,000 alang sa pagpa-printa ug mga campaign materials.
Bukas ang Comelec karong adlawa, bisan ug holiday, aron pagpanawat sa iduso nga SOCE sa mga kandidato nga wala pa makasumitir niini. (AZLG)