CEBU City Mayor-elect Edgardo Labella mopausbaw sa tinuig nga financial assistance sa libuan ka senior citizens sa Dakbayan sa Sugbo.
Ang outgoing vice mayor niingon nga iya pang tan-awon kon pila ang iyang mapuno sa P12,000 sanglit adunay bag-ong ordinansa nga giaprobahan ang Konseho.
“Mahitungod sa pag-increase sa atong financial assistance, ato nang buhaton apan susihon nato kon pila ang atong madugang because we have to take also the consideration of the resources sa City pero ato gyud nang pun-an,” padayag ni Labella.
Ang pag-usbaw sa financial assistance sa mga senior citizen nagkinahanglan pa og amendatory ordinance sa City Council para mausab ang kasamtangang P12,000 nga iduso sa iyang mga kaalyado nga konsehal.
Gipadayag ni Labella nga kon mapirmahan ni outgoing Mayor Tomas Osmeña ang amendatory ordinance ni Councilor-elect Eugenio Gabuya Jr., nga naglatid sa pag-apil sa mga senior citizen nga narehistro niadtong 2011, 2012 ug 2013, sa way duha-duha iya kining ipatuman.
Maapil sila sa umaabot nga usbaw sa financial assistance.
Apan hangtod sa pagsuwat niining balita, wa pa kumpirmaha kon naaprobahan na ba ni Osmeña ang ordinansa ni Gabuya.
Libuan ka mga senior citizen ang makarga sa bag-ong lista sa Office of Senior Citizens Affairs (Osca) para sa sunod tuig kon kini mauyonan.
Base sa balaod, kon mapakyas pagpirma ang kasamtangang mayor, ang ordinansa subling iindusar sa bag-ong Sanggunian ug mobalik sa unang proseso.
Sa kasamtangan, adunay 75,009 ka lolo ug lola ang nagdawat og ayuda gikan sa City Government og tag P12,000 matag tuig. (PAC)