IHATAG na sa Kagamhanan sa Dakbayan sa Lapu-Lapu sunod semana ang P1 million nga reward money nga gitanyag alang sa tawo nga makatabang pagsulbad sa pagpatay sa dalagang si Christine Lee Silawan.
Mao kini ang gipahibawo ni outgoing Lapu-Lapu City Mayor Paz Radaza atol sa usa ka press conference kagahapong adlawa Hunyo 11, 2019.
Matod sa mayor nga nakurat usab siya sa kalit nga pag plead not guilty sa akusadong si Renato Llenes atol sa iyang arraignment sa miaging semana kay niangkon na kining daan sa nabuhat niyang salaod.
Gani diha ang mayor pag-abli ni Llenes sa iyang mga Facebook account nga maoy iyang gigamit sa pakig-communicate kang Silawan.
Apan dihang nasuta niya nga ang bugtong rason ra sa pag plead not guilty ni Llenes mao ang pamasin sa akusado nga maos-osan ang iyang posibleng silot ug kasong iyang giatubang, nakasabot ra siya.
Matod ni Radaza nga sakto ang mga pulis sa pagtumbok kang Llenes nga suspek kay ang pag-plead not guilty wa magpasabot sa pagbakwi, kon di ang pagpaus-us sa kaso, gikan sa murder ngadto sa homicide.
Ihatag
Nunot niini, di na kinahanglan nga huwaton pa niya ang dagan sa kaso ni Llenes o kon kanus-a kini mahukman sa kasong iyang giatubang.
Ang importante, matod sa mayor, nga mahatag na ang gisaad nilang reward ngadto sa Lapu-Lapu City Police Office.
Ang kapulisan na ang mohatag niini kon si kinsa ang ilang tagaan nga nakatabang sa ilang imbestigasyon.
“We are preparing on this nga paghatag posible next week, daghan lang mi giatiman karong semanaha. Maghimo pa ta endorsement ani, I think isud pa ni sa SB (supplemental budget) pero earmarked na ang P1 million,” matod ni Radaza sa pangutana unsa ang proseso sa paghatag sa naasoyng kantidad.