DAW moagi pa’s lungag sa dagum ang Toronto Raptors una nila makab-ot ang labing una nga kampeyonato sa NBA Finals.
Kini human nangiyawat gyud ang Golden State Warriors sa championship series Game 5 ug gipildi sila sa iskor nga 106-105.
Miapas ang Golden State gikan sa six-point deficit sa uwahing tulo ka minuto aron matala ang ikaduhang kadaugan sa serye.
Sa kasamtangan, anaa sa 3-2 ang standing.
Mibubo og 31 puntos si Stephen Curry alang sa Warriors apil na ang gibuhian niyang lima ka tres.
Si Curry sab ang ikaunom nga magduduwa gikan 1976-77 nga mitala og 10 career 30-point games sa NBA Finals.
Kauban ni Curry sa listahan sila Michael Jordan (23); LeBron James (20); Shaquille O’Neal (16); Kobe Bryant (13) ug Kareem Abdul-Jabbar (10)
Wa sab nagpauwahi ang “Splash Brother” ni Curry nga si Klay Thompson nga miiskor og 26 puntos, ug pito ka tres.
Miundang man sa pagduwa si Kevin Durant human subling misakit ang tiil sa injury, mikamada kini og 11 puntos.
Kini ang unang beses nga miduwa si Durant sukad siya mipahuway tungod sa calf injury atol sa Western Conference semifinals kontra Houston Rockets.
Gitakda nga mopailawom sa MRI si Durant aron makita kung unsa ka-grabe ang naangkon nga injury.
Luyo sa two-time NBA Finals MVP, migrabe sab ang collarbone injury ni Kevon Looney mao nga wala kini makabalik sa pagduwa.
Mihataw sab si DeMarcus Cousins nga mitigum og 14 points, ug si Draymond Green nga may 10 points, 10 rebounds ug walo ka assists.
Tungod niini, dako ang tsansa nga matabla pa ang duwa sa Game 6 sa Oracle Arena sa Biyernes.
Sa bahin sa Toronto mikamada og 26 puntos si Kawhi Leonard, samtang may 18 puntos si Kyle Lowry.