BISAN di ako miyembro sa Kapa Community Ministry International, Inc., apan naguol ako sa akong mga silingan, paryente, higala, ug kauban sa trabaho nga napalong ilang paglaum nga makadawat sa panalangin (blessing) tungod kay gipasira na sa gobyerno.
Ang Kapa, nga gitukod ni pastor Joel Apolinario, nagsugod sa ilang negusyo pinaagi sa DTI permit niadtong 2016 isip Kapa Coop Convenience Store and General Merchandise sa among lugar sa Bislig City.
Apan ilang negusyo gipasira sa City Economic Enterprise tungod sa wa pagtuman sa probisyon ug nagdawat na sila og investments uban sa promisa nga makadawat og 30 porsyento nga interes matag buwan ang miyembro. Gawas sa pagpasira, gidemanda sab ilang pastor sa korte.
Tungod niini, milalin ang ilang pastor sa Alabel, Sarangani Province diin gipadayon ang iyang ministriya hangtud nga miabot na sila sa nagkadaiyang lugar sa Mindanao, Visayas hangtud na sa Luzon.
Tinuod nga daghan ang nakasapi sa among lugar gikan sa binuwan nilang madawat sa Kapa.
Duna nay mga magtutudlo nga niundang sa ilang trabaho tungod kay mas dako ang ilang kitaon kaysa pagpanarbaho.
Gani, duna pay opisyal sa Department of Education (DepEd) nga miundang na sa trabaho tungod kay nahimong overall lecturer sa ilang grupo nga mohatag og dakong porsyento sa kita matag bulan.
Dihang nabalita nga gironda na ang mga opisina sa KAPA, daghan sa akong mga higala ug parente ang naguol unsaon pa nila pagbayad sa inutang nga sakyanan.
Kung gibati ko og kaluoy sa mga miyembro, naluoy usab ako sa ilang pastor tungod kay patung-patong ang suliran nga iyang gipas-an karon ilabi na sa posibleng kaso nga ipasaka kaniya sa otoridad.
Kini human giingon sa Securities and Exchange Commission (SEC) nga “scam” ang iyang gihimo nga pagdawat og investment sa ngalan sa donasyon ug ang salapi nga iyang natigum nga ginegusyo ilawom sa pangalan sa iyang asawa o pamilya.
Alang sa mga miyembro, di kamo angay mabalaka tungod kay kung alang sa kahimayaan sa atong Diyos ang inyong gihimo, di kamo pasagdan sa Ginoo ning inyong suliran.
Akong balikon sa makadaghan nga higayon, di ako supak sa inyong tinguha nga pagtabang sa katawhan basta mosunod kita sa balaod.