MATANAO, Davao del Sur -- Napalaw ang pipila ka mga miyembro sa Kapa (Kabus Padatoon) Ministry International Inc. samtang nagkapa-kapa sa pag-adto sa buhatan niini aron bawion ang ilang gihatag nga donasyon, adlaw’ng Lunes, Hunyo 10.
Usa si Rebecca, 49, taga Digos City, naalarma human nakabalita nga nanirado na ang mga buhatan sa KAPA tungod sa mando ni Presidente Rodrigo Duterte.
Misamot sab ang kabalaka ni Eliazar, 43, taga Bansalan human nabaniog ang pagronda sa mga sakop sa National Bureau of Investigation (NBI) ug Criminal Investigation and Detection Group (CIDG) sa mismong balay ni Kapa founder pastor Joel Apolinario didto sa General Santos City sa maong adlaw.
Apil sa gironda ang pipila nila ka buhatan sa Tagum, Pagadian City ug uban pang lugar sa Mindanao.
Sayo niini, gipahibawo sa Facebook page sa KAPA nga wala una silay opisina tungod kay maglusad og “week of prayers” ug sugod Hunyo 11 ngadto 13 kon diin himuon ang “prayer rally” sa Gensan.
Adlaw’ng Lunes sab nagpagawas og pahayag ang Securities Exchange Commission (SEC) nga Hunyo 4, gitugtan sa Court of Appeals ang ilang giduso, kauban sa Anti-money Laundering Council (AMLC), ang pag-freeze sa mga bank accounts ug assets nga adunay koneksiyon sa Kapa.
Sumala sa SEC nga usa ka non-stock corporation ang KAPA apan nakita nila ang daw anomalusong pagpamatigayon niini.
Unang gibawi sa SEC ang Certificate of Incorporation sa Kapa tungod sa serious misrepresentation.
Ang KAPA giingong nagadawat og donasyon sa ilang mga miyembro apan adunay 30% nga porsiyentong bugti nga “payout”.
Giklaro sa SEC nga “unsustainable” ang investment scheme niini sanglit gikinahanglan ang P15 bilyones matag buwan aron mabayran ang lima ka milyong miyembro niini nga naka-contribute og kantidad P10,000 matag usa.
Ang ubang sakop giingong nihatag sab og donasyon nga P100,000.
Giabisohan sa SEC ang publiko nga mag-amping ug motaho sa ilang head office o extension offices sa investment-taking activity sa Kapa. (Orlando B. Dinoy)