GIKUMOT ang kasingkasing sa mga netizens human makita ang family bonding Facebook post sa pamilya kinsa namatay ang asawa ug tres-anyos nga anak sa mangilngig nga disgrasya sa kadalanan sa Crossing Matina Pangi, Davao City Martes sa buntag, Hunyo 11.
Sa Facebook wall ni Racky Lirazan Viernes, ang bana sa usa ka babaye nga dala ang 3-anyos nga anak nga sakay sa traysikad nga naapil sa disgrasya, iyang gisubli nga gipakita ang ilang hulagway diin niadtong Dominggo, Hunyo 9, dungan sila nga naniudto.
Mga hulagway nagpakita sa ilang pagpangaon sa usa ka restawran sa San Pedro Street, Davao City ala 1:52 sa hapon human sa ilang pagsimba sa San Pedro Cathedral diin uban nila ang iyang tulo ka mga anak.
Sa kapsyon niini nga, “Thanks God it’s Sunday”, gisubli niya kining gi-post human sa disgrasya nga duna nay kapsyon nga, “Ma Emely Sales Dionela ug Rabbi Kyle... Wala ko magdahum mao nani atong last bonding... #RIP #ILoveusomuchMaAndRabbiKyle I have to be strong para kay Rap2 lalo na sa iya medication ug Rain sa ila pag-eskwela... Life must move on... Ma, wala gyud ka pananghid... diretso lang gyud ang panghitabo.”
Nasayran nga sa Panabo City nagtrabaho ang bana nga si Ram, diin kagahapon ang asawa uban ang anak niini nga 3-anyos nagsakay og traysikad gikan sa ilang pagkuha og kuwarta sa usa ka money remittance sa Matina Crossing dihang kalit silang nalambigit sa nadisgrasya.
Dead on the spot ang mag-inahan, diin ulahi pa nga napalgan ang 3-anyos kay natabunan sa sinako nga bugas nga karga sa 10-wheeler truck.
Sa kuha sa video sa netizens sa pag-rescue sa bata, daghan ang naghilak sa ilang komento dihang gihulat ang iingon sa mga rescuers sa sitwasyon sa 3-anyos.
Dihang miingon ang mga rescuers nga “body bag,” misamot ang kasubo sa netizens human nasayran nga patay na ang biktima nga 3-anyos.
Subay sa inisyal nga imbestigasyon sa traffic section sa Talomo Police Station, nasayran nga kusog ang dagan sa 10-wheeler truck nga dunay kargang mga sinako nga bugas nga midaro sa mga sakyanan nga kasugat niini.
Sa dashcam nga kuha sa sakyanan ni Lap Ki Ku, makita nga misugat na kanila ang 10-wheeler truck diin usa siya sa mga nakalikay nga misunod sa paglikay sa usa ka sakyanan nga unang nakasugat niini.
Migula nga siyam ang namatay sa disgrasya diin gikataho pa nga dunay usa ka biktima nga naputlan og ulo.
Giingon sa drayber sa 10-wheeler truck nga si Joel Sinampay Aras, 36-anyos, taga Camaman-an, Cagayan de Oro City nga dihang anaa pa siya sa atubangan sa usa ka gasolinahan sa Carlos P. Garcia Highway, nawad-an na og brake ang iyang gimaneho nga midaro sa laing walo ka mga sakyanan.
Subay sa report, ang mga nangamatay mao sila Jhonny Ustan, Renato Lozada, mag-inahang Emelyn Viernes ug Kylie Viernes, 3-anyos, usa ka madre nga si Sister Carmen Saniel ug laing upat pa ka tawo nga padayong gipang-ila.
Samtang ang naa sa ospital mao sila Jose Saiman Danny San Jose ug Leonardo Sagillo.
Kasong reckless imprudence resulting to multiple homicide, serious physical injury and damage to property ang atubangong kaso ni Aras didto sa korte.