“DILI lamang alang sa akong kaugalingon, pamilya ug sa katawhan ang akong pagserbisyo apan nagserbisyo ko tungod ug alang sa Ginoo.”
rKini ang panglantaw ni Senior Police Officer 2 Julius Gonzaga, 37, Traffic Investigator sa Police Station 3 sa Agora kinsa usa ka graduate sa Electronics Communication Engineer (ECE) ug gani mi-proceed pa sa kurso nga Professional Education tuig 1999 diha sa Mindanao University of Science and Technology.
Matud ni Gonzaga nga anaa sa ilang linya o dugo ang pagpanerbisyo isip usa ka polis apan matud pa niini kagustohan gayud niya ang mahimong polis sukad pa kaniadto.
Saysay pa niini nga ang inahan ug amahan niya mga miyembro usab sa Philippine National Police lakip na ang mga uyuan ug ubang miyembro sa pamilya kinsa iyang mga inspirasyon.
Gibutyag niini nga tuig 2000 gigrasyahan kini sa dihang nakapasar sa gi-eksamang Licence Examination for Teacher, Civil Service Exam ug Napolcom diin gipili gayud niini ang pagka polis.
Mokabat na sa 15 ka tuig sa iyang pagserbisyo isip usa ka polis ug pito ka tuig isip usa ka Traffic investigator.
Pinakalisod matud pa sa iyang trabaho ang kaso nga adunay ma-hit & run nga makabsan gayud sa kinabuhi.
Alang kaniya kini ang pinakalisod tungod kay sakit alang sa pamilya ang mawad-an sa mahal sa kinabuhi ug dili pa gayud daling masikop ang responsable sa isidente kay lage dali man kining mobiya sa dapit.
Kung ipahulagway niini ang iyang pamilya isa lamang ang bugtong maingon niini ang “happy family”.
Kalabot na usab sa dili maayo nga panglantaw sa ubang tawo ngadto na sa mga polis igo na lamang kini nga miingon nga dili angayang e-generalize sa komunidad ang tanang miyembro sa Philippines National Police tungod kay daghan pa usab ang tinud-anay nga nagserbsiyo diha sa katawhan.
Alang usab niini, importante kaayo ang Police Community Relation (PCR) diha sa ilang tinud-anay nga pagpanerbsiyo aron dali nga masulbad ang mga kriminalidad nga gahitabo sa palibot.
"PCR is to win the heart and understand the community and to create mutual relationship between PNP and [the] populace,” dugang pa niini.
Ang komunidad nagsalig sa kapolisan ilabi na sa tinud-anay nga pagserbisyo ug pagproteher samtang ang mga polis usab sa laing bahin nag-agad sa kumonidad sa ilang suporta ug kooperasiyon aron makab-ot ang tinuod ug kahusay dili lamang ning dakbayan apan lakip na sa tibuok kalibotan.