HEPE sa Criminal Investigation and Detection Group (CIDG) Central Visayas miawhag sa publiko nga dili dayon motuo sa mga investment scams nga nagtanyag og dakong kantidad nga mobalik ang kwarta kanila kay ilad kini ug dili magdali sa ilang pagpadatu.
Nabantayan karon sa kadagkoan sa kapulisan sa Central Visayas may labot sa reaksyon sa publiko sa social media nga gibasol pa nila ang kapulisan sa dihang gipang ronda ang mga buhatan sa KAPA Ministry Community International ug ang Organico Agribusiness Ventures.
Matod ni Police Colonel Lito Patay, ang hepe sa CIDG 7, nga kasagaran sa mga tawo gitan-aw lang ang naka pay-out ug kung badlongon, gani sila pa ang nahimong dautan.
“Ang uban man gud tan-awon lang nila kung naay nagpay out, ok ra nila masuko na og badlongon kita pay kontrabida. Di nila tan awon kung tinuod ba ni siya nga negosyo ug naa bay ingon ani nga negosyo di ba ni kalokohan? Syempre sayon ra kayo way gihimo, dawat ra og kwarta,” matod ni Patay.
Sakto matod pa ang pamahayag ni President Rodrigo Duterte nga walay bisan usa ka dako nga negosyo sa tibuok kalibutan nga mohatag og taas nga porsiento sa gustong mo-invest niini nga maoy hinungdan nga dili magpailad.
Ang gihimo karon sa gobyerno mao ang paghatag og proteksyon sa publiko ug dili modako ang problema aron dili usab sila mabiktima sa bisan unsa nga matang sa pagpangilad.
Awhag ni Patay sa publiko nga kung gusto sila nga molambo ang ilang kwarta, dili mag dali sa pagpakadatu.
“Dili gyud magpailad kay imbes nga gusto tang ma habwa sa kalisod, mosamot na hinuon ta og kapait inig buto ani, pait na kayo mo dako na ang chaos sa atong community nga moingon na sila nga wa may gihimo ang gobyerno nga kahibaw man sila nga bawal diay ni or naa diay mahitabo or naa man diay balaod kontra ani, So karon mahimo pang kontrabida ang gobyerno,” dugang ni Patay.
Gawas sa Organico, Kapa ug Ada Farm Agri Ventures nga nalutsan og search warrant nga giluwatan sa korte sa kaulohan, aduna pay laing investment company sa Central Visayas nga wala tugoti sa Securities and Exchange Commission (SEC) nga ilang isunod kung aduna nay kamandoan sa korte.
Samtang wala lang una ablihi sa kapulisan sa lungsod sa Compostela ang vault nga gituohan nga maoy gisudlan sa mga kwarta sa mga tawo nga mi donate sa Kapa.
Ang maong vault kasamtangan nga gi-kustodiya sa kapulisan sanglit apil kini sa mga ebedensya nga ilang gihuptan labot sa kaso nga giatubang kaso sa maong grupo.
Matod ni Police Brigadier General Debold Sinas, director sa Police Regional Office-Central Visayas (PRO 7) nga ila pa una nga gipaabot ang kung kinsa man ang moangkon nga sila ang tag-iya niini ug mohatag sa mga gikinahanglang mga ebidensya.
Didto na matod pa ang mga police sa panimalay ni Abad apan giingong wala kini mopakita sa iyang mga sakop.
Walay plano si Sinas nga makigkita ni Abad apan mimando na siya sa Compostela Police Station nga pahibaw-on siya kung motumaw na kini sa imbestigasyon.
Gipa kustodiya na karon sa buhatan sa CIDG 7 ang mga computer sets nga ilang giimbargo sa buhatan sa Organico nga moabot ngadto sa kapin usa ka gatus ka unit.
Matod ni Patay nga ang maong mga computers maoy gamiton nila nga ebedensya alang sa pagpasakag kaso sa management sa Organico ug ila pang gipasusi karon sa PNP Anti-Cybercrime Group.
Wala na silay nakuha nga kwarta nga gituohan niya nga gidala na sa management apan hugot ang ilang monitoring sanglit nagpadayon matod pa ang pay in ug pay out niini pinaagi sa online transaction.
Matod ni Patay nga kung aduna na silay mabantayan kung asa mag binayranay ilang ipahigayon ang entrapment operation tungod kay klaro kaayo kini nga pagpangilad. (AYB)