WALA nay kinabuhi ug padung na madugta ang lawas sa usa ka kanhi Overseas Filipino Worker dihang napalgan sa mga silingan ug kapulisan sa Purok 1, Barangay Dapitan, lungsod sa Cordova pasado alas 9 kagahapon sa buntag, Hunyo 12.
Ang napalgang patay nailhang si Jul Berdin Braga, 53 anyos, nga molopyo ra usab sa nahisgotang lugar.
Matod sa imbestigador sa Cordova Police Station nga si Police Chief Master Sergeant Danny Alburo nga nakadawat sila ug tawag gikan sa barangay nga adunay mireklamong mga silingan ni Braga nga nanimaho ang panimalay niini.
Dali kini nilang gisusi ug didto ilang nakit-an ang patayng lawas niini sud sa iyang lawak nga padung nang madugta.
Dili na masuta sa kapulisan kung unsa ang posibleng gikamatyan sa biktima apan dihang ila kining napalgan gihigtan ang liog niini ug wire samtang aduna usay kutsilyo nga nakit-an duol sa iyang patayng lawas.
Giingong katapusang nakit-ang buhi si Braga sa mga silingan nianang adlawng Dominggo human kini nagpalit ug sud-an.
Nag-inusara na kini nga nagpuyo sa iyang panimay human mamatay ang iyang asawa ug wala usab kini anak.
Sigon ni Alburo nga niadtong Lunes, Hunyo 10, ang mga silingan ni Braga nakabantay nga naay naglagubo sulod sa balay sa biktima niadtong alas 10 sa gabii.
Ang mga silingan niingon sa kapulisan nga nakadungog silag tingog gikan sulod sa balay pero wala ra nila ni tagda hangtud namatikdan na nila ang baho gikan sa balay ni Braga.
Ang hepe sa Cordova Police Station nga si Police Captain Efren Diaz Jr. mibutyag nga sa ilang inisyal nga imbestigasyon posibleng tulis ang motibo sa pagpatay ni Braga.
Kini human adunay buak sa luyong bahin sa bintana sa panimay niiini dihang gisusi sa kapulisan nga posibleng maoy giagian sa mga suspetsadong misulod sa panimay ni Braga.
Posible usab nga natulog si Braga dihang gisulod kini ug dihang nakamata napugos na lang sa pagpatay ang mga suspetsadong misulod sa panimay niini.
Gitan-aw usab sa kapulisan ang taho nga bag-o lang usab nahalinan ug yuta si Braga sa kantidad nga P250,000.
Walay makakompirmar kun nahanaw ba ang naasoyng kantidad diha sa iyang lawak apan gikompirmar sa mga kabanay niini nga nawala gayud ang mahalong cellphone niini ug usa ka laptop.
“So far nangangalap pa kami ng mga information para makatulong sa imbestigasyon natin kasi 3 days nato nangayri eh kung sana may tumawag sa atin tungkol sa narinig nila noong Monday evening nakapag follow-up tayo sana dun,” sigon ni Diaz.
Ang patayng lawas ni Braga gipahiling na sa Scene of the Crime Operatives (SOCO) aron masuta unsa ang mga samad nga posibleng naangkon niini nga miresulta sa iyang hinanaling kamatayon.