GISIGURO sa kapulisan sa Cagayan de Oro City Police Office (Cocpo) nga dili tugotan sa ilang hanay ang ilegal nga mga binuhatan human usa ka pulis ang nasikop sa entrapment operation.
Nasikop si Patrolwoman Sheryl Lou Licayan, 38, minyo nga taga Macanhan, Barangay Carmen ning siyudad, pinaagi sa entrapment operation sa kapulisan sa Regional Intelligence Division (RID) Northern Mindanao.
Gibutyag ni Police Liutenant Colonel Mardy Hortillosa, tigpamaba sa Cocpo, nga wala gitugotan sa kadagkoan sa Police Regional Office (PRO) Northern Mindanao ug sa Cocpo ang ilegal nga mga binuhatan.
“Dili pa kita makabalo kung iyaha ra ba ni or modus ni niya as far as I know wala ni gi-tolerate sa atong regional office nga mang extort og kwarta bugti sa pasalig nga ipasulod sila kung naa man gale ingon ana ilegal gyud kana siya nga binuhatan,” dugang niini.
Giingong gihatagan usab og insaktong proseso ang maong pulis ilabi na sa pagtubag sa maong alegasiyon ug giisip nga inosente hangtod nga kini mahukman apan giingong mag-atubang gihapon kini sa kasong administratibo.
“Wala gyud na siya gi-tolerate sa atoang organization again among utrohon nga dili namo i-tolerate kining ingon ani nga binuhatan sa among mga police although presume innocent pa gihapon siya, karon suportaan nato ang kaso nga ipasang-at sa iyaha naa dayoy administrative case nga mosunod, wala pa namo masugdan kay unahon pa ang criminal case,” dugang ni Hortillosa.
Giklaro usab niini nga imbestigahan kini pag-ayo ilabi na nga madamay ang ngalan sa regional office ilabi na sa recruitment section nga walay igong basehan apan kung moingon kini nga duna kini koneksiyon sa taas magamit usab ang testimonya niini.
Giingong kini usa usab ka pahimangno sa kapulisan nga dili molambigit sa susama niini nga mga kalihokan.
Gidugang pa usab niini nga kung maka piyansa kini mabalik kini sa serbisyo ug kasamtangang ibutang una diha sa holding unit.
Nasayran nga pulo na kini ka tuig sa serbisyo og nadestino na kini sa Police Station 8, Police Station 2, Tourist Police, City Mobile Force ug Regional Mobile Force ug pinakaulahi sa Police Station 4 sa Carmen ug kasamtangang naka sick leave diin mobalik na unta karong Hunyo 14, 2019.