Regional director, mayor magtagbo Hunyo 13

GITAKDANG makig-istorya ang regional director sa Cagayan de Oro ngadto kang Mayor Oscar Moreno diin posibleng hisgutan ang mamahimong mohulip sa pagka city director sa Siyudad sa Cagayan de Oro, adlaw’ng Huwebes, Hunyo 13, 2019.

Kini human nabakante ang City Director sa Cagayan de Oro City Police Office (Cocpo) human nakabsan sa kinabuhi si kanhi City Director Police Colonel Nelson Aganon, human naaksidente sa pre-jump sa motorcycle riding course.

Gibutyag ni Police Lieutenant Colonel Mardy Hortillosa, tigpamaba sa Cocpo, nga gitakdang magtagbo sila si Police Brigadier General Rafael Santiago Jr., director sa Police Regional Office (PRO) ug Moreno sa posibleng hisgutanan.

“Ugma gitakda nga makigmeeting , mu-courtesy call or makig-istorya ang atong Regional Director sa atong mayor together with Kagawad Calizo siguro usa sa mga istoryahan nila ang pagbutang og bag-o nga City Director sa Cagayan de Oro City,” matud ni Hortillosa.

Gidugang pa niini nga giingong buot lang usab ni Santiago nga makigkita ni Moreno ug wala pa kini nahuptan nga listahan alang sa posibleng mohulip sa maong posisyon apan dunay lima ka mga pangalan ang ihatag ngadto kay Moreno gikan sa PRO-Northern Mindanao.

“Sa side sa regional director gusto siya mo courtesy lang , ang region maoy maghatag og recommendee didto sa mayor si mayor na mopili ana, sa akong nadunggan naay taga Cagayan, naa poy taga Luzon, lima gyud na ang ihatag,” dugang niini.

Gitakdang mga alas 11 ang takna makigtagbo kini apan depende nalang usab kini sa kung dunay kausaban.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph